“Пошалым чаналары—2014” яңа талантлар ачты

15 февраль 2014 ел., шимбә
“Пошалым чаналары—2014” яңа талантлар ачты
Узган атнада Арчаны гына түгел, Казанны да “Пошалым чаналары—2014” фестивале гөрләтте. Быел бишенче тапкыр уздырылуы өстенә, үзенең 10 еллык юбилеен да билгеләп үтте фестиваль.
Баштагы өчесендә өч Пошалымнан чыккан якташлар арасында гына узган бәйге соңгы икесендә район буйлап талантларны барлый. Җыр фестивале пошалымлылар өчен көтеп алынган бәйрәм, авылдашларның очрашу кичәсе дисәң дә, ялгыш булмас. Бәйрәмгә хәтта чит төбәкләрдә яшәүче авылдашлар да кайткан. Рөстәм Закиров әнә шулай талантларны барлап, дөньяга танытуда бер изгелек кылса, авылдашларына очрашу оештырып та рәхмәтләр җыя.
Җыр фестивале өч көнгә сузылды. Беренче көнне Урта Пошалымда сайлап алу турына 47 катнашучы килгән (2012 елда 79 булган). Катнашучыларның яше чикләнмәгәнлектән, арада 3нче сыйныфта укучыдан алып лаеклы ял яшен-дәгеләр дә бар. Шартлар буенча алар “Арча” халык җырын, 1970–2000 еллар аралыгында композиторлар тарафыннан Арча турында иҗат ителгән ретро җыр һәм эстрада җыры башкарырга тиеш. Жюри бик таләпчән.
“Жюрига катнашучылар арасыннан лауреат, дипломантларны сайлап алу кыен булды, чөнки һәрберсе нык әзерлек белән килгән. Мин аның шулай булуын бик теләгән идем, райондашларым өчен горурланып утырам. Конкурс үземнең инициатива белән оештырыла. Мин моны ничек күз алдына китерәм, шулай эшлим. Авылны яратам. Бишенче тапкырында да Аллаһы Тәгалә шундый матур көннәр бүләк итә. Конкурсны тиешле дәрәҗәдә оештыру өчен бар көчләрен куеп әзерләнгән мәдәният йорты мөдире Дилә Сафинага, китапханәче Гөлназ Галимҗановага, Булатка, Рамилгә зур рәхмәт!..” — ди якташ җырчыбыз.
Авылда бәйрәм гөрли. Аллы–гөлле итеп бизәлгән җигүле атлар урамнарны иңли, тамак ялгап алырга теләүчеләрне кайнар чәй, шашлык көтеп тора. Пошалым яклары элек–электән чана, арба ясау осталары белән данлыклы. Җырчының максаты да әнә шул осталарның хезмәтен (ул кәсепне инде аларның оныклары дәвам иттерә) дөньяга таныту, халкыбызның милли йолаларын онытмыйча яшь буынга җиткерү.
Рөстәм Закиров, кая гына барса да, үзеннән Пошалым чаналарын калдырмый. Туган җире рухы сеңгән әлеге бүләкне яраткан җырчыларыннан кабул итеп алу чит төбәкләрдә яшәүче милләт-тәшләребез өчен әйтеп бетергесез шатлык хисләре бирә. Ә чаналарны Югары Пошалым егете Рәдиф Нигъмәтуллин ясый, би-зәкләрен кызлары төшерә. Останың кул гына түгел, күңел җылысын да үзенә сеңдергән чаналар күз явын алырлык матурлыгы белән җәлеп итә. Балаларны мондый матур чанага утыртып йөрүләре нинди күңелледер! Быелгы “Пошалым чаналары” конкурсына Рәдиф 50 чана ясаган. Алар бәйгенең җиңүче дипломантлары һәм лауреатларына бүләк ителде.
Рөстәм абый конкурсны башка бәйгеләргә әзерләнү өчен трамплин, дип атый. Бүген эстрадада ныклы адымнар белән атлау-чы Илназ Баһавиев (Баһ), Рафил Җәләлиев, Дамир Гасыймов та шушы конкурс карлыгачлары.
Конкурсның быелгы җиңүчеләре 1 дәрәҗә лауреат Сөмбел Заһидуллина, 2 дәрәҗә лауреат Айсылу Габдинова, 3нче дәрәҗә лауреат Раил Бакыев та киләчәкләрен җыр сәнгате белән бәйләргә тели. “Пошалым чаналары”ндагы “Тамашачы мәхәббәте”н Югары Пошалымнан Зәлия Саттарова яулады, “Арча” көен иң оста башкаручы Рөстәм Сабиров булды. Бүләкләргә дә юмарт Рөстәм абыйлары, беренче лауреатка 10 мең, икенчегә— 7,5 мең, өченчегә 5 мең сум премияләр, калган 9 дипломантка 2,5 мең сум премия бүләк итте.
Җиңүчеләр катнашындагы концертларны Арча, Казан тамашачылары да карау бәхетенә иреште. Һәр икесенең дә концерт заллары шыгрым тулы иде. Инде фес-тивальнең үз тамашачысы — фанатлары да барлыкка килгән. Казанда узган концертта сюрприз көтеп тора иде: тамашачы арасында 10 чана уйнатылды. Арча районы башлыгы Алмас Назировның да концертка килеп туган ягын, милләтен таныту өчен янып йөргән якташыбызга рәхмәт сүзләре җиткерүе, конкурсантларга уңышлар теләве бәйрәмгә аеруча ямь өстәде.
Арабызда Рөстәм Закиров кебекләр булганда милләтебез югалмас, иншалла. Тик андыйлар күбрәк булса иде...
Розалия ЗИННӘТОВА
Сайттагы барлык материаллар лицензия буенча тәкъдим ителә:
Creative Commons Attribution 4.0 International
Яндекс цитирования