Мечты сбываются.

«Эх, Әтнәдә дә бассейн булса  иде», – дип хыялланучыларны куандырырга ашыгабыз. Булачак! Һәм инде киләсе елның язына ук ачылыр дип көтелә.

2018 елда Татарстанның барлык район үзәк­лә­рендә бассейннар булды­рылачак. Бу хакта инде җәй көне үк физкультура, спорт һәм яшь­ләр эшләре буенча Дума комитеты вәкилләре белән очрашуда респуб­лика җитәкчесе Рөстәм Миңнеханов белдергән иде. “Татарстанда спорт өл­кәсен киңәйтү,  спорт объектлары төзелешен үстерү кысаларында инде киләсе елга ук бассей­ны булмаган бер район үзәге дә калмаячак. Шулай ук республикада универсаль спорт мәйданчыкларын төзү дәвам итә. Кышкы чорда файдалану өчен чаңгы базалары да төзелә”, – дигән иде ул чакта Президент.   
Әйткән сүз – аткан ук, диләр безнең татарда. Җитәкчеләр әйткән икән, димәк, шулай булачак та. Озак көттерми Әтнә үзәгендә дә бассейн төзелеше башланды. Ул Олы Әтнә мәктәбе янында урнашачак. Җәй башында биредә эш башланган иде инде. Башта территорияне әзерләделәр. Чистартты­лар, тирә-ягын койма бе­лән әйләндереп алдылар. Соңрак бассейн төзү эш­ләре башланып китте. Бү­генге көндә биредә кызу эш кайный. Бассейн эш­ләүчеләр көнне-төнгә ялгап хезмәт куя дисәм дә, ялгышмам. Обьект­ка теләсә-кем кереп тә йөри алмый, капка төбендә – сакчы. Әлегә монда басейн­ның фундаменты са­лына, җир асты эшләре баш­карыла. Төзелешнең мәйданы 1384,55 квад­рат метрны тәшкил итә. Бинаның габарит размерлары исә 42гә 30 метр­га тәңгәл. Зурлар өчен аерым, балалар өчен аерым бассейннар булачак. Зурларныкы 25кә 8,5 метр булса, балаларныкы 10га 6 метр булыр дип көтелә. Әлеге спорт обьектының төп максаты – район масштабында су спорты төрләре буенча бәйгеләр үткәрү, ритмик гимнастика белән шөгыльләнү мөмкинлеге бул­дыру һәм гомумән, физик әзерлекне үстерү. Төзелеш эшләрен махсус специальләшкән оешма башкара. Март аена инде бассейн кулланылышка тапшырылыр дип көтелә. “Район үзәгендә бассейн булу районыбыз халкына зур мөмкинлекләр ача. Йөзү кебек спорт төре сәламәтлек өчен бик файдалы булса, яшьләрнең, балаларның биредә шөгыльләнүе – вакытны бушка сарыф ит­үгә, кирәкмәгән нәр­сәләр белән кызыксынуга кир­тә булып тора­чак”, – дип үз фикерләре белән уртаклашты бу хакта яшьләр эше һәм спорт бүлеге җитәкчесе Рамил Шәйхиев.
Татарстанда барлыгы 1,5 миллион кеше спорт белән шөгыльләнә. Бу якынча 41,5 процентка тиң. Спорт обьектлары исә – 10588. Яшьләр эше һәм спорт бүлегеннән алын­ган мәгълүматларга караганда, районыбыз­да физкультура һәм спорт белән даими шөгыль­ләнүчеләр саны барлык халыкның 68 процентын тәшкил итә. Районда яшәү­че халыкның күп өле­шен пенсия яшендәге­ләр тәшкил итүен дә әйтсәк, бу бик зур сан, минемчә. 25ләп спорт обьекты эшләп килүе дә куанычлы хәл. Аларның та­гын бер обьектка артуы, һәм бу обьектның ха­лык тарафыннан көтеп алынган бассейн булуы тагын да куандыра. Игелеген күрергә язсын.