Бүген Бөтендөнья гепатит белән көрәш көне билгеләп үтелә

Ел саен 28 июльдә Бөтендөнья сәламәтлек саклау оешмасы катнашуында БМО халыкара көннәре системасында Бөтендөнья гепатит белән көрәш көне билгеләп үтелә.

Бу көннең максаты – гепатитның төрле формаларына карата җәмәгатьчелекнең хәбәрдарлыгын арттыру.

Вируслы гепатит — А, В, С, D һәм E гепатит кебек танылган йогышлы авырулар төркеме – бөтен дөньяда йөзләгән миллион кешене зарарлый. БССО мәгълүматларына караганда, дөньяда ел саен 1,4 млн. артык А вируслы гепатит белән авыру очрагы, якынча 4 млн. В вируслы гепатит очрагы, 3-4 млн. С вируслы гепатит очрагы теркәлә.

Гепатит – күп кенә йогышлы һәм йогышсыз факторларга, шул исәптән алкогольгә, шулай ук кайбер фармакология препаратларына бәйле рәвештә килеп чыга алган бавыр ялкынсынуы ул. Әмма гепатит барлыкка килүнең иң еш сәбәбе – вируслар. Хәзерге вакытта биш гепатит вирусы билгеле, аларның һәркайсысы кеше өчен куркыныч тудыра: А, В, C, D һәм Е.