ЯҢАЛЫКЛАР

21 ноябрь – бухгалтерларның һөнәри бәйрәме. Шул уңайдан Финанс-бюджет палатасы коллективы Казанга К.Тинчурин исемендәге драма һәм комедия театрына барды. Театрга керер алдыннан коллектив Иске Аракчино бистәсендә урнашкан Бөтен диннәр гыйбадәтханәсе дип аталучы  архитектура корылма белән танышып чыкты. Төрле диннәргә багышланган әлеге храм күпләрдә кызыксыну уятты.

Ә көзге ноябрь киче лирик спектакль карау белән тәмамланды. “Беренче мәхәббәт” спектакле һәркемнең күңеленә хуш килде. Актерларның уены, спектакльның куелышы бүгенге көнне тагын да бизәп, һәркемгә уңай эмоциялар бүләк итте.

Бүген бухгалтерлар көне билгеләп үтелә. Шул уңайдан Финанс-бюджет палатасы рәисе Шәмсун Әкбәр улы Сөнгатов исәп-хисап эше белгечләрен тәбрикләп үтте. Үзәкләштерелгән бухгалтерия бухгалтерлары Эльмира Мөхәмәдиярова Саба муниципаль районы Башлыгының Мактау грамотасына, Алинә Гаптриева Саба муниципаль районы Башлыгының Рәхмәт хатына лаек булдылар.

13 ноябрьда  Саба муниципаль район Советының чираттагы утырышы булып узды. Аның эше белән район Советы рәисе Рәис Нургалиевич Миңнеханов җитәкчелек итте. Утырышта 2025 елга hәм 2026-2027 елларның планлаштырган чорына район бюджеты проекты беренче укылышта каралды. Доклад белән районның Финанс-бюджет палатасы рәисе Ш.Ә Сөнгатов чыгыш ясады.

Финанс-бюджет палатасының бүлек җитәкчесе Гөлнара Заһидуллина Мәскәүдә дәүләт һәм муниципаль учреждениеләрнең бухгалтерлары һәм финансистлары өчен XXXIV Бөтенроссия конференциясендә катнашып кайтты. Әлеге традицион һөнәри конференциядә исәпкә алу, хисаплылык, бюджет классификациясенең төп мәсьәләләре яктыртылды. Анда эчке финанс аудиты стандартлары, әлеге стандартларны гамәлгә ашырганда хезмәткәрләрнең хокуклары һәм бурычлары каралды. "Электрон бюджет" системасында финконтроль", СМАРТ-контроль” һәм башка бик күп кызыклы темалар кузгатылды. Конференциядә катнашучылар 2025 елда үз эшләрен нинди норматив актларга нигезләнеп алып барырга кирәклеге турында күп кенә актуаль һәм файдалы мәгълүмат тупладылар һәм бухгалтерия өлкәсендәге күп кенә яңалыклар турында алдынгы экспертлардан практик киңәшләр дә ала алдылар.

Үзәкләштерелгән бухгалтерия белгечләре Алмаз Маулин һәм Артур Шәяхмәтов «Дәүләт мәгълүмат системасында эшләү. Татарстан Республикасы дәүләт органнарының һәм алар буйсынуындагы учреждениеләрнең бухгалтерлык исәбе һәм хисаплылыгы" темасына укулар уздылар. Уку барышында белгечләр өчен кызыклы һәм актуаль темалар күтәрелде.

Юлбат һәм Мамалай балалар бакчасында тәрбияләнүче балалар Финанс-бюджет палатасында булдылар, бухгалтер хезмәте, финансист эшенең асылы белән таныштылар. Рольләргә бүленеп, бюджетны дөрес бүләргә, акчаны дөрес тотарга, ничек экономия ясарга икәнен дә практик шөгыль аша өйрәнделәр.

"СабаБалаһөнәр" муниципаль программасы кысаларында һәм бухгалтер һөнәре белән якыннан танышу максатыннан Мичән һәм Симет балалар бакчаларында тәрбияләнүчеләр Финанс-бюджет палатасында булдылар. Гаилә бюджеты үрнәгендә алар керем, чыгым, бюджет, экономия төшенчәләре белән таныштылар. Акчаның гаиләгә ничек туплануын, нинди чыгымнарга сарыф ителүен дә практик дәрес аша үзләштерделәр. Бухгалтер һөнәре өчен никадәр җаваплылык, төгәллек, тырышлык сыйфатлары кирәк икәнен дә күрделәр.

Узган елгы чакырылыш егетләре, хәрби хезмәтләрен тутырып, туган якларына кайта башлады. Алар арасында Финанс-бюджет палатасында эшләп киткән егетебез Айнур Әхмәтшин да бар. Айнур Домодедовода хәрби- диңгез флотында  радиотелеграфист булып хезмәт итте. Хезмәт итү чорында алган барлык күнекмәләр, һөнәрләр, бигрәк тә армиядагы тәртип һәм дисциплина, егетләргә киләчәктә дә тормыш иткәндә ярдәм итәр дип ышанасы килә.

Бу көннәрдә 2025 елның беренче яртыеллыгы өчен вакытлы матбугатка язылу башланды. Финанс-бюджет палатасы хезмәткәрләре,  җитәкчеләре Ш.Ә.Сөнгатов белән берлектә, ел да "Саба таңнары" - район газетасына теләп язылалар. 

Бүген Саба урта мәктәбенең 5 сыйныф укучылары Финанс-бюджет палатасында булдылар һәм бухгалтер профессиясе белән якыннанрак таныштылар. Бюджет ничек туплана, нинди өлкәләргә бүленә, Үзәкләштерелгән бухгалтерияның һәр бүлеге нинди эшчәнлек алып бара, нинди программалар нигезендә эш башкарыла – болар барысы да укучы кызларда кызыксыну тудырды.