ЯҢАЛЫКЛАР

Түбән Шытсу мәктәп яны лагерына йөрүче балалар, Югары Шытсу авылында урнашкан сөтчелек комплексына, экскурсиягә килделәр. Хезмәткәрләр балаларны төп эшләр белән таныштырдылар. Авыл хуҗалыгы тармагы зур тырышлык, җаваплылык таләп итә торган тармак.

Түбән Шытсу мәдәният йортында мозаика җыю буенча мастер класс үткәрелде. Мәктәп яны лагерена йөрүче балалар әлеге чарада актив катнаштылар. 

Түбән Шытсу авыл җирлеге үзешчәннәре 17 октябрь көнне Бигәнәй мәдәният йортында "Туган җиргә кайтты кайтмаганнар "Хәтер китабы"на төренеп" дип исемләнгән концерт куйды. Әлеге концерт Бөек Җиңүнең 80 еллыгына багышланды. Җыр-бию, милли уен кораллары белән чыгыш ясау һәм башка сәнгать төрләре тамашачы күңеленә хуш килде. Барлык катнашучыларга рәхмәт белдерәбез!

Югары Шытсу һәм Түбән Шытсу авылларында урам юллары тигезләтелде. Әлеге эшне АО "Татавтодор" оешмасы башкарды. Эшләнгән эшнең гомуми озынлыгы 1620 м.тәшкил итте. 

Югары Шытсу авылында гомер кичерүче Рәхимә Баһан кызы 100 яшьлек туган көнен билгеләп үтте. Аны зур юбилее белән котларга Саба муниципаль районы башлыгы Миннеханов Р.Н. килде һәм үзенең ихлас теләкләрен җиткерде. Шакирзянова Рәхимә   Богмановна кызы 1925 елның  16 октябрендә Теләче районы Иске Җөри  авылында  дөньяга килә. 1948 елда Югары Шытсу  авылы егете Шарипҗан  абыйга  кияүгә чыга. Алар бик тәртипле 1 ул, 3 кыз устергәннәр.  Рәхимә  апа туган төбәгендә тыл хезмәтчәне булып хезмәт юлын башлап җибәргән. 16 яшеннән урман кискән, окоп казыган, агач кискән, Казанда тоз чыгаруда, Кукмарада итек фабрикасында да эшләгән. Югары Шытсуга  килен булып килгәннән соң Рәхимә  апа “Беренче Май”колхозында төрле эшләрдә хезмәт куеп лаеклы ялга чыккан.  Аның эш стажы 40 елдан артык. Намуслы, тырыш хезмәте өчен Рәхимә апа күпсанлы Мактау грамоталары белән бүләкләнгән. Бүгенге көндә Рәхимә апа  Югары Шытсу авылында малае Мөдәрис, килене Гөлнур  тәрбиясендә гомер итә. Аның 5 оныгы бар. Киң күнелле, ярдәмчел,  һәркемгә рәхмәтле Рәхимә апаны  авылдашлары бик  хөрмәт итә.

Югары Шытсу мәдәният йортында "Һәрвакыт булсын кояш" дип исемләнгән тынычлык дәресе үткәрелде. Әлеге чарада катнашучы балаларга тынычлык, дуслык һәм бердәмлек төшенчәләренең никадәр мөһим икәнлеге аңлатылды. Шулай ук терроризмга каршы эшләнгән стенд нигезендә төп кагыйдәләр искәртеп үтелде.

Түбән Шытсу авылында иске йорт сүтү эше бара. Иске, җимерек хәлдәге йортлар авыл җирлеге биләмәсен ямьсезли, матурлык тудыруга комачаулый. Шулай ук ташландык территориягә балалар уйнарга керүдән һәм янгын чыгудан куркыныч. 

  Түбән Шытсу авылында яшәүче Галявиев Әмин Галяви улы һәм Галявиева Фәүзия Корбан кызының гаилә корып яши башлауларына быел 70 ел булды. Шул уңайдан аларны Саба муниципаль районы башлыгы Р.Н.Минниханов котлап узды.  Әмин абый белән Фәүзия апа 1955 елның 20 мартында гаилә корып яши башлыйлар.  Әмин абый башта  колхозда төрле эшләрдә,  Фәүзия апа  сыер савучы булып эшли. 1963 елда алар  Пермь өлкәсенә күченеп китәләр. Анда Әмин абый 25 ел  шахтер булып, Фәүзия апа  балалар бакчасында  җыештыручы булып эшли. Гаиләдә бер-бер артлы 4 бала дөньяга килә. Тәртипле, эш сөючән, шафкатьле, һәрвакыт ярдәмгә  мохтажларга булышучы  итеп  тэрбияли  аларны  Әмин  абый белән Фәүзия апа. Балалары тормышта үз урыннарын табып, төрле тармакларда тырышып хезмәт куялар. 1995 елда Галәвиевлар гаиләсе кире туган якларына кайтып төпләнә. Лаеклы ялда булуына карамастан Әмин абый колхозда эшчәнлеген дәвам итә: фермада, ындыр табагында каравылда тора. Әмин абый хемәт һәм тыл ветераны, Фәүзия апа да хезмәт ветераны. Бүгенге көндә алар Түбән Шытсу авылында  кызлары Асия апа тәрбиясендә гомер итәләр, 8 оныклары 12 оныкчыклары бар.  Киң күнелле, ярдәмчел Әмин абый белән Фәүзия апа күршеләренә һәм авылдашларына гел игелек кылып яшиләр, шуна  күрә аларны  авылдашлар бик  хөрмәт итә. Без аларга   балаларының, оныкларының игелеген күреп, бәхетле, тигез гомер итүләрен телибез.

Югары Шытсыда автомобиль юлын реконструкцияләү буенча киң колачлы эш алып барыла. Эшне "Татавтодор"АҖ башкара. Реконструкциягә чаклы юл куркыныч иде: текә төшү текә күтәрелеш белән алмашынды. Участокта күз күреме түбән иде. Автомобиль юлын реконструкцияләү-юл өслегенең торышын яхшыртуга, хәрәкәт иминлеген арттыруга һәм юл хәрәкәтендә катнашучыларның барысына да уңайлы шартлар тәэмин итүгә юнәлдерелгән чаралар комплексы ул.

Елыш авылында ЩПС өслеге салынган юлны ремонтлау эшләре төгәлләнгән. Эшне "МДСУ-1"ҖЧҖ башкарды. Халык саны һәм автомобиль хәрәкәте интенсивлыгы аз булган  юлларыны төзегәндә  бүгенге көндә вак таш-ком катышмасы кулланыла. Бу төр өслекнең төзелеш һәм карап тоту бәясе түбәнрәк булса да, эксплуатация күрсәткечләре югары. Елыш авылында әлеге эш торак пунктларда юл-урам челтәрен норматив хәлгә китерү программасы кысаларында башкарылды.