ЯҢАЛЫКЛАР

13 апрель көнне Явлаштау мәдәният йортында “Милләт яме –йола, бәйрәмнәрдә” фестиваль конкурсы узды. Конкурста Шәмәрдән ашлык кабул  итү предприятиесе- ипи пешерү йоласын,күптармаклы коммуналь хезмәт күрсәтү оешмасы-киленгә су юлы күрсәтү йоласын,җаваплылыгы чикләнгән “Таиф-НК АЗС” җәмгыятенең  Шәмәрдән аерымланган  бүлекчәсе – Кич утыру йоласын күрсәттеләр.Чыгышлар бик зур җаваплылык белән ,тирән эчтәлекле итеп әзерләнгән иде һәм халык күңеленә бик хуш килде

5 апрельдә Евлаштау авылында ТНВ телеканалының «Халкым минем» тапшыруы өчен төшерүләр узды.

Авыл кешесе өчен иң җаваплы чор - елны туйдырырлык көннәр башланды. Җирдә эшләүдән тәм тапкан чын игенче-механизаторлар бу сәгатьләр җитүен алдан ук көтеп алдылар. Авыр, мәшәкатьле, тузанлы эш булса да, икмәк игүдән, азык-төлек муллыгы булдырудан да игелеклерәк, саваплырак хезмәт табылырмы?  Бу көннәрдә «Саба» җаваплылыгы чикләнгән җәмгыятенең Явлаштау бригадасында да язгы кыр эшләренә керештеләр.Бүгенге көндә кырларга ашлама кертү эшләре башланып китте.Башкарган эшләре уң булсын, һава шартлары уңай килеп, басулардан мул уңыш җыеп алырга язсын.

Бюджет учреждениеләре хезмәткәрләре көче белән юл буйларын чүп-чардан чистарту буенча эш башкарылды.

Табигатьтә яз тантана итә, карлар эри, күчмә кошлар туган якларына кайта,  һавада кошлар моңы . Шул матурлыкны карап , табигатьтәге үзгәрешләрне күзәтү максатыннан 1 апрель көнне Явлаштау авыл китапханәчесе  балаларны   табигатькә экскурсиягә алып чыкты . Җир өстендә кар бик әз калган, гөрләвекләр ага, агачларның бөреләре күренә башлаган, тал песиләре күренә. Балалар бик шатланып шушы матурлыкны күзәтте. Язгы ташу турында истәлекләр сөйләнде, хәрәкәтле уеннар уйналды.

Кул эшләре гомер-гомергә затлы иҗат булып санала.  Үзең иҗат иткән көндәлек куллану әйберләре гади дә, уңайлы да, кадерле дә була . Балаларны, яшьләрне рәсем сәнгате белән кызыксындыру максатыннан Саба үзәк китапханәсе тарафыннан 31 март көне Явлаштау авыл китапханәсендә “Минем иҗат җимешем” дип исемләнгән сумкага бизәк төшерү буенча мастер- класс булды. Яшүсмерләр 12 сумкага матур, үзенчәлекле бизәкләр төшерделәр. Бер- берләре белән аралашып, киңәшләшеп эшләгән эш                     үзләренең матур  нәтиҗәсен бирде, балаларда  үз- үзләренә ышаныч уятты.

Хезмәт ул шатлык, бәхет,сөенеч чыганагы. Хезмәтеннән тәм табып, аны яратып башкарганда , ул яшәү шатлыгына әйләнә. Кешенең абруе аның хезмәте белән бәяләнә. Аылыбызда мәдәният өлкәсендә эшләп абруй казанган, авылдашларыбызның олы хөрмәтен яулаган кешеләр бар, алар Шамилов Ринат абый һәм Әхмәтҗанова Гәүһәрияләр. Үзләренең бар тырышлыгын мәдәнияткә биргән кешеләр алар. Аларны чакырып  ,30 март көнне  Явлаштау  авылы китапханәсендә “Мәдәнияткә багышланган гомер” дип исемләнгән очрашу уздырылды. Алар үзләренең хезмәт юллары, эшләгән чорда булган кызыклы вакыйгалар, күренекле кешеләр белән очрашулар хакында кызыклы вакыйгалар турында сөйлэделәр. Балаларның сорауларына җаваплар бирделәр. Тарихны чагылдырган фотолар карау аеруча күңелле булды.

Каникул ул балаларның көтеп алган ял вакыты. Ул ял итү, үзең  теләгәнчә  вакытыңны үткәрү һәм китап уку өчен иң кулай вакыт. Шул уңайдан 27 март көнне Явлаштау авыл китапханәсендә “Китап алдым кулыма” дип исемләнгән әдәби кичә уздырылды.  Яз турында шигырьләр, хикәяләр укылды, табышмакларга җаваплар эзләдек. Соңгы вакытта укылган китаплар турында әңгәмә уздырылды. Китапханәнең актив китап укучысы Сабирова Рәгидә апа балаларга кәгазьдән кош ясарга өйрәтте. Бу шөгель балаларда кызыксыну уятты. Балалар буш вакытларын дөрес һәм файдалы итеп уздырдылар.

Үзебезгә бирелгән зур байлыгыбызны еллар узгач та югалтмыйча сакларга кирәк. Аның өчен дөрес яшәү рәвеше алып барырга, спорт белән шөгельләнергә, иптәшләрең белән дус, тату булып , вакытны дөрес итеп уздырырга кирәк. 28 март көнне Явлаштау авыл китапханәсендә “Начар гадәтләрне булдырмыйк” дип исемләнгән әңгәмә оештырылды. Чара барышында балалар белән әдәп-әхлак кагыйдәләре, җәмәгать урыннарында  үзеңне тоту тәртибе хакында сөйләштек. Әңгәмә вакытында әйтеп үтелгән матур гадәтләрне балалар чәчәк таҗларына язып куйдылар. Соңыннан мультфильм геройлары ясадылар, хәрәкәтле уеннар уйнап  вакытларын дөрес итеп уздырдылар.

Март ае – язның беренче ае. Табигать җанлана, кешеләр табигатьнең матурлыгына сокланып туя алмыйлар. Кошлар сайравы күңелләргә сөенеч өсти. Туган якларына кошлар кайта. Һәркайсыбыз бу күңелле вакытны сагынып көтеп ала. Кошларга игътибар кърсәтелә, оялар ясала. Нәкъ менә шул уңайдан 24 март көнне Явлаштау авыл китапханәсе “Кошларым- якын дусларым” дип исемләнгән әдәби кичә уздырды. Күчмә кошлар турында, кошларның үзенчәлекле яклары турында сөйләгәннән соң  крассворд сорауларына җавап эзләдек.Интрактив уенда актив катнаштылар, табышмакларга җаваплар эзләдек. Китапларга күзәтү ясалды. Балалар кошлар турында белемнәрен ныгыттылар.