ЯҢАЛЫКЛАР

 5 февраль көнне Мишәбаш мәдәният йортында Җәлил хәзрәт  катнашында “Күңелләр яктыра иман белән” дип исемләнгән  вәгазь кичәсе булды . Кичә Мишәбаш авылы имам –хатыйбы Гафиятов Алмаз Сәүбан улы һәм   мәчеткә нигез салучы Талипов Илгиз Исламович  улы чыгышлары белән башланды. Аннан соң  Җәлил хәзрәтнең вэгазьләре тыңланды. Соңыннан намаз уку өчен мәчеткә киттеләр.

7 февраль  көнне Явлаштау авыл җирлегендә халык җыены булып узды.  Җыелыш башында  «Татмедиа»АҖ  һәм  «Саба дулкыннары» АҖ әзерләгән видеоматериаллар каралды. Көн тәртибендә түбәндәге мәсьәләләр каралды:

 1. Участок полиция хезмәткәре Хабибуллин Фәнил Фоат улы чыгышы.

2. Янгынга каршы күзәтчелек бүлеге җитәкчесе Галимуллин Айнур Рифкат улы чыгышы

3. Урман хуҗалыгы участковые Зиннатуллин Илгиз Альберт улы  чыгышы.

4. Сабадагы «Россельхозбанк» өстәмә офис җитәкчесе Билалова Рәзинә Кашафетдин кызы  чыгышы.

5. 2022 елдагы эшчәнлек нәтиҗәләре һәм 2023 елда эшне камилләштерү планнары буенча җирлек территориясендәге муниципаль учреждениеләр (мәгариф, мәдәният, медицина, спорт, социаль тәэминат һ.б.) хисабы.

6. Явлаштау авыл җирлеге советының 2022 нче елга отчеты һәм 2023 елга планнары

7. Узган елгы отчет җыенында халыкның биргән сораулары, тәкъдимнәрнең үтәлеше һәм 2021 елга халыктан сораулар

Җыенны йомгаклап Саба муниципаль районы Башкарма комитет җитәкчесенең инвестицион үсеш һәм эшкуарлыкка ярдәм итү буенча урынбасары Кутдусов И.И. чыгыш ясады. Ул авыл җирлегендәге авыл хуҗалыгы предприятиеләре, КФХ-ларның яхшы эшчәнлекләрен билгеләп үтте .  Муниципаль район территориясендә максатчан программаларның гамәлгә ашырылуы, районда икътисадый, демографик һәм иҗтимагый-сәяси вәзгыять, 2022 елда башкарылган эшләр һәм 2023 елга планнар турында сөйләде.

Мишәбаш командасы мини футбол буенча Саба районы Чемпионатының беренче лигасында икенче урынны алды. ӘхӘтов Идел Кәрим улы турнирның иң яхшы бомбардиры дип танылды. Команданы уңышлары белән котлыйбыз һәм уеннарда уңышлар телибез.

Явлаштау урта мәктәбе ашханәсендә ремонт эшләре бара.

Мишәбаш авылында Әхәтов крестьян-фермер хуҗалыгы территориясендә 130 баш мөгезле эре терлек өчен терлекчелек торагы төзү дәвам итә.

Балаларның ялын файдалы итеп уздыру максатыннан Явлаштау авыл китапханәсендә “Витаминлы башваткыч” дип исемләнгән интеллектуаль уен оештырылды. Балалар башваткыч сорауларына җаваплар эзләделәр.Табылган җаваплар буенча китаплардан шигырьләр укыдылар. Шуны ук рәсемгә төшерә бардылар. Витаминлы яшелчәләрне  балаларның хәтерендә калдыру өчен нәтиҗәле чара булды.

Явлаштау авыл китапханәсендә Х. Халиковның 90 еллыгы уңаеннан “Балаларның якын дусты” дип исемләнгән балалар иртәсе уздырылды. Шагыйрьнең биографиясе һәм иҗаты белән таныштырылды. Балаларның күңеленә үтеп керсен һәм хәтерләрендә саклансын өчен шигырьдәге геройлар күрсәтеп барылды. Мәсьәлән: “Конфет агачы” шигырен укыганнан соң агачтагы конфет- табышмакларга җаваплар эзләнде, “Яшел шар” шигыре шар эченнән чыкты, “Ипекәй белән сөйләшү” шигырендәге сорауга җавапны Равилә апа Халиковадан ишеттеләр. Сорауларга дөрес җавап биргән һәм шагыйрьнең шигырен яттан сөйләргә өйрәнеп килгән балаларга бүләкләр бирелде.

Явлаштау авыл китапханәсендә   яшүсмерләр белән  “Гомер ул бер генә бирелә” дип исемләнгән очрашу уздырылды. Очрашуга авылыбызның имамы Инсаф Галимҗанов килде. Яшүсмерләргә әдәп- әхлак тәрбиясе, җәмәгать урыннарында үз- үзеңне тоту һәм начар гадәтләргә тартылмыйча, дөрес яшәү рәвеше алып бару турында сөйләде. Сорауларга җаваплар бирде.

 Элек-электән һәр милләт үзенең кул эшләренә оста булган, киң кырлы иҗат кешеләре белән горурланган.Бүгенге көндә кул эшләнмәләре торышыбызда зур урын алып тора. Матурлык тудыру, яшь буынга бу эшнең нечкәлекләрен аңлату максатыннан “Ак калфак” берләшмәләре зур эшләр башкара.    Ә эш тәҗрибәсе белән үзара уртаклашу кешеләрне бер-берсенә якынайту, дуслаштыру, татулыкка өндәүнең мөһим бер чарасы булып тора.Нәкъ  шул максатны күздә тотып, Явлаштау авыл китапханәсендә  ”Бикле сандык төпләреннән чыгып ул әйләнеп кайтты халкыма”дип исемләнгән фольклор кичә уздырылды. “Ак калфак” берләшмәсенә йөрүче ханымнар  җыелып  тәҗрибә уртаклаштылар.Уздырган чарада катнашып төрле биремнәрне үтәделәр, китаптан өзекләр тыңладылар.

 Явлаштау урта мәктәбе укытучысы Фәйрүзә Нурислам кызы Шиһабиева үзенең 60 яшьлек юбилеен билгеләп үтте. Юбилярны хезмәттәшләре, укучылары,укытучы-ветераннар һәм Явлаштау авыл җирлеге башлыгы Нуриев Ренат Хәмит улы котлады.