ЯҢАЛЫКЛАР

2021 елның 21 март көнендә Юлбат мәдәният йорты территориясендә кыш озату - "Нәүрүз" бәйрәме үткәрелде. Юлбат мәдәният йорты, китапханә хезмәткәрләре көче белән әзерләнгән тамаша күрсәтелде, Юлбат авыл җирлеге, "Юлбат" авыл хуҗалыгы предприятиясе оешмалары, Юлбат төп мәктәбе белән берлектә урамда пешерелгән ботка һәм коймаклар белән өстәлләр әзерләделәр. Юлбат халкы автив рәвештә уеннарда катнашты һәм күңелле итеп ял итте.

20 март көнне Юлбат мәдәният йорты , китапханә,Йосыф-Алан клуб  хезмәткәрләре Йосыф -алан авылы клубында якташ шагыйрәбез, өч китап авторы  Илмира Гимаева белән “Дусларым- шигырьләрем” дип исемләнгән  әдәби музыкаль кичә үткәрде. Һәр китабына аерым тукталып,тамашачыларны кызыксындырган сорауларга җаваплар алып, шигырь укып,җырлап үтте шигырь кичәсе. Бик җылы,тәрбияви очрашу булды.

19 март көнне Юлбат авыл китапханәсе клуб белән берлектә балаларны әүвәл заманнарда уздырыла торган бәйрәмнәр белән таныштырды.Ул чорларда да заманына күрә үз бәйрәмнәре,күңел ачулары булган.Шуларның берсе-Нәүрүз бәйрәме.Балаларга  шушы бәйрәм турында ,нинди тәртиптә уздырылуы турында сөйләп үтелде.Соңыннан балалар белән, авылда үтәчәк Нәүрүз бәйрәмендә “Карга боткасы” пешерү өчен, өйдән-өйгә йөреп дәрә җыйдык. Балалар халыкны  бәйрәмгә чакырдылар.

18 март көнне Юлбат мәдәният йорты һәм китапханә хезмәткәрләре “Сугыш хатын – кыз йөзе түгел” проекты кысаларында хәтер сәгате үткәрделәр. Чара барышында сугыш елларында авылыбызда авыр хезмәт башкарган хатын-кызлар турында әңгәмә барды. Аларның батырлыкка тиң булган, җиңүне якынайту өчен эшләгән эшләре турында укылды. Чараны уздырганда “Кыз- әбиләр” китабыннан өзекләр һәм тыл ветераннары турында тупланган папка кулланылды. «Истәлекләр калсын күңелдә»дип исемләнгән тематик күргәзмә тәкъдим ителде.

15 март көнне Юлбат   мәдәният  йортында,  китапханә  белән берлектә  үзебез сәхнәләштергән “Табылдык” пьесасы авторы Рәмзия Хөсәенова белән очрашу-кичә үткәрелде. Очрашуда Рәмзия Хөсәенова бик матур чыгыш  ясап, “Табылдык”ларга матур теләкләрен  җиткерде. Залдан кызыксындырган сорауларга  Рәмзия ханым бик теләп җавап бирде. Рәмзия Хөсәенова  иҗатына сокланмый  мөмкин түгел. “Өзелмәсен кайтыр юлыгыз! ”дигән китап авторы да ул. “Табылдык”ларга матур теләкләрен язып, китабын бүләк итте. Видеоязманы карап, бергә, бераз гына “Чаганлы”да яшәп кайттык. 

Юлбат авыл җирлегендә 80/20 программасы буенча йортлар төзелеше дәвам итә. Йортларның эчке эшләре эшләнә. Төзелешне ПМК Мелиорация ҖЧҖ һәм “Кристал” ҖЧҖ башкара.

Татарстан тарихы  белән танышу максатыннан 12 март көнне Юлбат мәдәният йорты хезмәткәрләре китапханә белән берлектә "Татарстан – туган җирем" дигән темага әңгәмә үткәрделәр. Китапханәче балаларны республикабызның тарихы белән таныштырды. Балалар башкалабыз, аның истәлекле урыннары турында күп яңалыклар белделәр һәм туган якны өйрәнү өлкәсендә булган белемнәрен тулыландырдылар. Соңыннан балалар «Мавыктыргыч Татарстан» китап күргәзмәсендә тәкъдим ителгән китаплар белән таныштылар.

8 март көнне Юлбат авыл мәдәният йорты һәм китапханә хезмәткәрләре, "Ак калфак" клубы әгъзалары белән берлектә, "Тәмле табын серләре" дип исемләнгән түгәрәк өстәл артында сөйләшү үткәрделәр. Чара барышында милли ризыклар әзерләү серләре белән уртаклаштылар. Төрле уеннар, конкурслар үткәрелде. Чара ахырында түгәрәк өстәл артында чәй эчү оештырылды, анда халык җырларын искә төшерделәр һәм бергәләп башкардылар. «Ак калфак» та катнашучыларның берсе Халикова Мәрзия Гатаулла кызы үзенең шигырьләрен укыды. Чара темасы буенча китап күргәзмәсе оештырылды.

5 март көнне, Халыкара хатын-кызлар көне алдыннан, Юлбат авыл китапханәсе һәм мәдәният йорты хезмәткәрләре тарафыннан «Ягез әле, кызлар" дип исемләнгән конкурс - уен программасы үткәрелде. Әлеге чарада 1-2-3-4 сыйныф укучылары катнашты. Чара темасы буенча китап күргәзмәсе оештырылды.

"Сугышның йөзе хатын-кызныкы түгел" дигән социаль-гуманитар проект кысаларында уздырылучы чаралар һәм ТР Дәүләт Советының хатын-кыз депутатларыннан торучы "Мәрхәмәт-Милосердие" берләшмәсенең беркетмәсен үтәү максатыннан, Юлбат авыл җирлегендә хатын-кыз тыл ветераннары 8 март бәйрәме белән тәбрикләнде. Бүләк пакетларга иганәче "Юлбат" авыл хуҗалыгы предприятиесе булды.