ЯҢАЛЫКЛАР

5 февраль көнне Юлбат авыл мәдәният йорты, китапханә һәм авыл фельдшеры Халыкара куркынычсыз интернет көне уңаеннан «Сәламәт булсаң –бай буласың» дип исемләнгән әңгәмә үткәрделәр. Чараның максаты: сәламәт яшәү рәвеше турында белем формалаштыру; коллективта үзара хезмәттәшлек күнекмәләрен ныгыту. Балалар фельдшерның сорауларына җавап бирделәр һәм сәламәт яшәү рәвеше турында лекция тыңладылар. Глобаль интернет өлкәннәр өчен генә түгел, балалар өчен дә күп кенә эшләрдә төп ярдәмчегә әверелә. Биредә алар кирәкле мәгълүмат эзлиләр, китаплар укыйлар, уйныйлар, аралашалар. Интернет челтәрендә куркынычсызлыкны ничек тәэмин итәргә? Чара барышында укучылар бу сорауга җавап таптылар. Балалар танып-белү викторинасында катнаштылар, бердәм рәвештә сәламәтлек һәм сәламәт яшәү рәвеше турында мәкальләр искә төшерделәр, «зарарлы», «файдалы» уенын кызыксынып уйнадылар.

29 гыйнвар көнне,  Туган телләр һәм халыклар бердәмлеге елы кысаларында, Юлбат мәдәният йорты, авыл китапханәсе хезмәткәрләре тарафыннан язучы, драматург, сценарийлар авторы,  ТР атказанган сәнгать эшлеклесе,  ТР язучылар ,  РФ театр әһелләре берлекләре әгъзасы Мансур Аяз улы Гыйләҗевка багышланган мәгълүмат сәгате үткәрелде. Чарада язучының тормышын, иҗатын, гаилә тарихын чагылдырган презентация тәкъдим ителде. Авторның китапларына, аның турында язылган журналлардан күргәзмә куелып, күзәтү ясалды. "Рәхәт яшибез" дип исемләнгән сатирик комедиясеннән өзекләр укылды.

Юлбат авыл китапханәсе, мәдәният йорты белән берлектә, 1 сыйныф укучылары өчен "Китап – белем чишмәсе» дип исемләнгән мәгълүмат сәгате үткәрделәр. Чара барышында туган телнең әһәмияте турында сөйләделәр. Шулай ук викторина үткәрелде, анда туган тел турында бик күп мәкальләр яңгырады. "Китап – якын сердәш ул" дигән китап күргәзмәсе һәм әдәбиятка күзәтү оештырылды.

Тенеки авылында яшәүче Муллиева Сания Муллый кызы 90 яшьлек юбилеен билгеләп үтте. Юбилярга Юлбат авыл җирлеге башлыгы Т.Р. Шәмсиев Россия Президенты котлавын тапшырды.

Юлбат мәдәният йорты һәм авыл китапханәсенең 23 нче гыйнвар планы нигезендә,   студентлар көне уңаеннан, танып-белү бәйгесе үткәрелде. Чараның тематикасы Туган телләр һәм халыклар бердәмлеге елына багышланды. Кичәге, бүгенге һәм булачак студентлар  бәйге барышында үзләренең белемнәрен барлап, зирәклекләрен һәм  тапкырлыкларын исбатлап,  күп төрле биремнәрне үти алдылар. Бер сорау да җавапсыз калмады. Чара бер сулышта, күңелле, эшлекле мохиттә үтте.

17 гыйнварда бөтен дөньяда «Балалар уйлап тапкан әйберләр көне» билгеләп үтелә. Юлбат авыл мәдәният йорты һәм китапханә хезмәткәрләре 2021 елның 17 гыйнварында "Балалар уйлап тапкан әйберләр көне» дип исемләнгән уен программасы уздырды.

Юлбат авыл мәдәният йорты һәм авыл китапханәсе планы буенча 10 нчы гыйнвар көнне  "Яраткан китап битләре буйлап" дигән темага әңгәмә үткәрелде. Чараның максаты: нәфис сүзгә мәхәббәт тәрбияләү, китап укуга кызыксыну уяту. Чара ахырында "Әдәби алан" проектында актив катнашучыларны бүләкләү булды. Проект Саба үзәкләштерелгән китапханәләр системасы тарафыннан оештырылды.

9 январь көнне Юлбат авыл мәдәният йорты һәм китапханә хезмәткәрләре балалар өчен «Төрле төстәге кино дөньясы» дип исемләнгән танып-белү программасы үткәрделәр. Чара мультфильмнар дөньясына багышланган иде. Балаларны мультипликацион фильмнар барлыкка килү тарихы белән таныштырдылар. Чара барышында балалар мультвикторина сорауларына җавап бирделәр, шулай ук мультфильм геройлары турында табышмаклар чиштеләр. Программа ахырында балалар «Куркынычсызлык әлифбасы» буенча видеороликлар карадылар.

8 гыйнвар көнне Юлбат авыл мәдәният йорты һәм авыл китапханәсе «Кышкы патшалык» дип исемләнгән экскурсия үткәрде. Балалар кышкы табигатькә сокланып, рәхәтләнеп уйнадылар: чанада һәм тимераякта шудылар.

7 гыйнвар көнне Юлбат авыл мәдәният йорты хезмәткәрләре,  китапханәче ел укучыларын барлады. Иң күп китап укучыга, иң күп китап укучы гаиләгә, өлкәннәр һәм яшьләр арасында иң күп китап укучыларга бүләкләр тапшырылды.