ЯҢАЛЫКЛАР

    “Казан” агросәнәгать паркында узган ярминкәләрдә ҖЧ “Игенче” җәмгыяте дә бик теләп катнаша.

    Быелгы язгы ярминкәләргә килгән кунакларны, сатып алучыларны, мичтә пешкән коймак, кайнар чәй,  удмурт халкының милли ашы булган перепечләр белән сыйладылар.

    9 нчы  апрель көнне "Игенче" ҖЧҖдә  тракторларга , прицепларга һәм башка үзйөрешле машиналарга техник карау узды. Чарада Татарстан Республикасы Дәүләт техник күзәтчелеге идарәсенең Саба муниципаль районы буенча баш дәүләт инженер-инспекторы Ибраһимов Ильяс Нәкыйп улы һәм хуҗалык белгечләре катнашты.

     4 нче  апрельдә ҖЧ “Игенче” җәмгыте ашханәсендә , төрле елларда шушы җәмгыятьтә эшләп чыккан йөздән артык  ветеран   һәм хәзерге көндә хезмәт куючы белгеч ир-атлар  катнашында  Ифтар мәҗлесе уздырылды. Мәҗлестә  Мөдәрис  хәзрәт Гыймранов катнашып, җыелучыларга ураза тотуның әҗер-саваплары турында сөйләде, вәгазьләр укыды.

          “Игенче” хоккей командасы, Лесхоз бистәсендә узган чираттагы бәйге белән хоккей сезонын япты. Исәп 8:9 булып “Игенче” командасы файдасына төгәлләнде.

      Сезон дәвамында ,  Кукмара районы Камышлы авылында , Шекше , Мишабаш, Эзмә авылларында узган хоккей ярышлары -“Игенче” командасыннан башка узмады. Ярышлар дуслык һәм спорт атмосферасында узды. Эш вакытыннан соң тренировкалар үткәреп, спорт белән шөгыльләнеп чыныккан егетләр, боз мәйданында кызыклы, мавыктыргыч уеннар күрсәтте.

    Җаваплылыгы чикләнгән " Игенче " җәмгыяте Рамазан аенда изге гамәлләр кылуны дәвам итә.

   27 нче март көнне, шушы җәмгыятьтә эшләп, хәзергесе көндә лаеклы ялда  булган ветераннарга,  азык-төлек  салынган күчтәнәч - пакетлар өләшенде. Әлеге изге эш   ел да уздырыла торган бер бик матур гадәткә әйләнде. Җәмгыятьнең әйдәп баручы белгечләре , сигез авылда гомер итүче ветераннарга , 280 күчтәнәч –пакет  өләшеп чыкты.

    «Игенче» ҖЧҖ җитәкчесе А.З. Зарипов, хуҗалыкта эшләүче хатын-кызларны 8 март бәйрәме  белән котлады һәм  бүләкләр, чәчәк тапшырды. Һәммәсенә ныклы  сәламәтлек, бәхет- шатлык, гаилә иминлеге  теләде.

   3 нче мартта Иләбәр авылы янындагы чаңгы трассасында кышкы спартакиада узды. Чаңгы ярышында  катнашучылар һәм аларга көч биреп торучы җанатарлар  тәмле пылаудан авыз итте,  кайнар чәй,  коймак һәм тәм-томнар белән  сыйланды.

ҖЧ “Игенче”  җәмгыятендә эшләүче – чаңгы спортын үз итүче хезмәткәрләр дә сынатмады.

Ир-егетләр арасында Сафиуллин Инзил Мөдәрис улы – I нче,

Хөсәенов Айдар Кәшип улы  – III нче урыннарны яуладылар.

Котлыйбыз!

  Игенче» ҖЧҖе, агымдагы елның кышлау чорында терлекләрне җитәрлек азык белән тәэмин итү өчен Марий Эл Республикасына чыгып сенаж әзерләде. Шушы көннәрдә  терлек азыгы хуҗалыкка алып кайтып урнаштырылды.

      24 нче февраль көнне Лесхоз бистәсендә  авыл хуҗалыгы оешмалары арасында узган чаңгы ярышында ҖЧ “ Игенче” җәмгыятеннән өч команда: “Игенче-1” , “Игенче –2” ,“Игенче- 3» командалары   катнашты. Ярыш барышында  “Игенче 1”  командасы -I нче, “Игенче -2” –II нче, “Игенче- 3” - IV нче  урыннарны яулады.Командаларның  призлы урыннарга ирешүе аеруча шатлыклы.

     Бик матур, бераз гына салкынча кояшлы көндә ,“Игенче” ҖЧҖ хезмәткәрләре һәм чакырылган кунаклар чаңгыга басты. Ярышны тантаналы шартларда җәмгыять җитәкчесе Зарипов Алмаз Зөфәр улы  ачып җибәрде. Ул чарада каташучыларны   котлап, ярышларның, күнегүләрнең дәвамлы булуын теләде, спортның, бигрәк тә чаңгы спортының сәламәтлек нигезе булуын ассызыклады.