ЯҢАЛЫКЛАР

3нче сентябрь көнне Курсабаш авыл китапханәсе мөдире Галимҗанова Ф.Н. "Дулкын" телерадиокомпаниясендә "Китапханәче сүзе" тапшыруында чыгыш ясады. Тапшыру башында китапханәче китапханәнең бүгенге көндә яшәеше, аның эше белән таныштырды. Шәхесләр елы уңаеннан, Түбән Утар авылында туып үскән Татарстанның атказанган артисты Энҗе Шаймурзина турында мәгьлүмат бирелде. "Яңа китаплар белән таныштыру" сәхифәсендә китапханә мөдире Фәнис Яруллинның "Кайту" дигән китабы белән таныштырды. Гаилә елы уңаеннан тапшыруга актив, үрнәк, гомерләрен балалар укытуга багышлаган гаиләләрнең берсе булган Шаймурзиннар гаиләсе чакырылды. Алар кыскача үзләренең тормышлары, эшләре белән таныштырып үттеләр. Гармун моңнарына төреп,  үзләренең матур теләкләрен җиткерделәр.

4 августта Шәмәрдән авыл китапханәчесе «Үсеш» Шәмәрдән лицееның 3 «В» сыйныф укучылары белән «Борчылусыз һәм күз яшьләрсез дөнья» хәтер сәгате үткәрде. Чара истәлек датасына - террорчылыкка каршы көрәштә теләктәшлек көненә багышланган иде. Россиянең бу истәлекле датасы 2005 елда «Россиянең хәрби даны көннәре турында» Федераль закон белән билгеләнгән һәм Беслан шәһәрендә булган фаҗигале вакыйгалар белән бәйле. Очрашу башында китапханәче балаларны «террор», «террорчылык», «террорчылар» төшенчәләре белән таныштырды, аннары балаларга бөтен кешелек террорчылыгына нинди куркыныч янавы турында сөйләде. Шулай ук Тынычлык  сүзенә аңлатма таптылар. Чара азагында укучылар күгәрченнәрне планетабызга беркеттеләр һәм дөнья терроризмга урын булмаганда гына үсә ала дигән нәтиҗәгә килделәр.

Саба туган якны өйрәнү музеенда бинаны капиталь ремонтлау эшләре дәвам итә.  Янгынга каршы системаны көйләү эшләре алып барыла.

Саба туган якны өйрәнү музее каршында эшләп килуче берләшмәгә йөрүчеләр белән берлектә Көек авыл  клубында оештырылган музейга сәяхәт кылынды. Клуб мөдире тарафыннан оештырылган әлеге музей, андагы бай экспонатлар, аларның тарихы белән танышу катнашучыларда зур тәэсир һәм соклану хисе калдырды.

Белем көне - СССРда 1984 елның 15 июнендә " Белем көне дип игълан итү турында" СССР Югары Советы Президиумы Указы белән кертелгән. Сатыш авылы мәдрәсә музее хезмәткәрләре укучылар өчен “Белем илендә” дигән темага викторина үткәрделәр. Укучылар әлеге бәйрәмнең килеп чыгышы белән таныштылар, командаларга бүленеп “Биологик култык”, “Әдәби архитектура” маршрутлары буенча телдән һәм язмача сорауларга җаваплар бирделәр.

Ел саен 30 августта Татарстан Республикасының барлык халкы иң мөһим дәүләт бәйрәмнәренең берсен — Татарстан Республикасы көнен билгеләп үтә. Әлеге истәлекле вакыйга уңаеннан 29 август көнне Ике басу Арташ авыл китапханәсенең мөдире Язлы Арташ авыл клубында (китап бирү пунктында) «Чәчәк ат, минем Татарстаным» дигән әдәби кроссворд үткәрде. Чара барышында Татарстанның хәзерге тормышы һәм тарихи үткәне, төп символлары, туган ягыбызның матурлыгы һәм табигый байлыгы, республикабыз территориясендә яшәүче халыкларның гореф-гадәтләре турында сөйләделәр. Аннары балалар бергәләп кроссворд сорауларына җавап бирделәр, ә аларга җавап бирергә «Минем Республика – Татарстан» китап күргәзмәсе ярдәм итте.

Татарстан Республикасы көне — милләтенә, диненә һәм мәдәниятенә карамастан, төбәкнең барлык халкын берләштерә торган бөтенхалык бәйрәме. Бу көнгә Шәмәрдән авыл китапханәсендә «По страницам шагая, о крае много узнаешь» дигән күргәзмә-экскурсия оештырылды. Күргәзмәдә Татарстан Республикасы турында, аның тарихы, символлары, күпмилләтле мәдәнияте һәм халыкларның гореф-гадәтләре турында сөйләүче төрле китаплар тәкъдим ителде.

2 нче сентябрь – бөтендөнья халкы икенче бөтендөнья сугышы тәмамлану көнен билгеләп үтә. 1945 нче елның 2 нче сентябрендә Япониянең капитуляцияләве турындагы актка кул куела. 65 миллион кешенең гомерен өзгән әлеге сугыш иң канкойгыч сугышларның берсе булып тора. Әлеге дата уңаеннан Сатыш авыл китапханәсендә китап күргәзмәсе оештырылды. Күргәзмәдә сугыш турында, анда күрсәткән батырлыклар турында китаплар урын алды. Китапханәче китапларга күзәтү оештырды.

Җаваплылык хисен балачактан ук тәрбияләү мөһим, бигрәк тә бу йорт хайваннарына кагыла. Хайваннар-уенчык түгел, ул гаилә әгъзасы! Әгәр дә балалар йорт койрыклыларына нәкъ шулай карый икән, йортсыз хайваннар саны күп тапкырга кими! 30 август көнне Ике басу Арташ мәдәният йортының китапханә белән берлектә «Безнең дүрт аяклы дусларыбыз»дигән мәгълүмат сәгате үткәрелде. Балаларга урамда хуҗалары булмаган хайваннар белән үзләрен ничек тотарга кирәклеге турында сөйләделәр. Барлык хайваннар да приют күзәтүе астында һәм ветеринарлар тарафыннан тикшерелмәгән бит.

31 августта Шәмәрдән авылының Җиңү паркында Татарстан Республикасы көненә багышланган «Татарстан дигән Ватаным бар» бәйрәм концерты булды. Тантаналы чара Шәмәрдән мәдәният йорты һәм «Акварель» халык хореография коллективы тарафыннан милли мәдәниятләр һәм гореф-гадәтләр елына багышланган «Матушка земля» прологы белән башланып китте. Котлау сүзе белән Шәмәрдән авыл җирлеге башлыгы А.К. Вәлиев чыгыш ясады. Кичә Шәмәрдән мәдәният йорты каршындагы үзешчәннәр, «Тулган ай» фольклор коллективы, Шәмәрдән модель китапханәсе хезмәткәре Л.Д. Мөхәммәтҗанова, Эзмә мәдәният йорты мөдире Зөлфәт Саматов катнашында матур концерт номерлары белән дәвам итте. Шулай ук концерт номерлары белән Family Band кавер төркеме чыгыш ясадылар.