ЯҢАЛЫКЛАР

2022 нче елда илебездә Пионерия оешканга 100 ел була. Шул унайдан Ш.З.Зиннуров исемендәге Сатыш урта гомуми белем бирү мәктәбендә “Пионерга 100 ел!” исеме астында мәдәни-музыкаль җыен үтте. Әлеге чарада укучылар “Пионер кем ул?”, “Ул нинди булырга тиеш?”, “Пионерияның символларын беләсеңме?” дигән сорауларга җавап таптылар. Шулай ук гәҗиттән пионер пилоткасы да ясарга өйрәнделәр.

13 гыйнвар көнне Бигәнәй мәдәният йортында китапханә белән берлектә «Яңа ел ишек шакый» дип исемләнгән ял кичәсе үткәрелде. 

Мамалай авыл клубында Һадиуллин Рәдиф Рәис улы истәлегенә багышлап, традиция буенча, бишенче ел рәттән “Мәңге безнең йөрәкләрдә” дип исемләнгән өстәл теннисы буенча турнир узды. 

3 нче гыйнвар көнне Бигәнәй мәдәният йортында китапханә белән берлектә  "Бөтен гаилә белән Яңа елга!» дип исемләнгән балалар бәйрәме үткәрелде. Залда балаларны бизәлгән чыршы  һәм Яңа ел музыкасы каршы алды.

Сатыш авыл җирлегенең мәдәният йортында "Кыш бабайдан Сюрприз" дигән лотерея билетлары уйнатылды. Бәйрәм башында авыл җирлеге башлыгы Шәрифуллин Ф.Ф. барысын да якынлашып килүче Яңа ел белән котлады. Тамашачылар җылы теләкләрен җиткерделәр, күңел күтәренкелеге һәм Яңа Ел кәефе алдылар. Барысы да канәгать калды, һәркем үз бүләген алды.

Сатыш авыл җирлеге мәдәният йортларында Бал-маскарад үткәрелде . Яңа ел кичәсендә күңелле, кызыклы уеннар булды, авылдашлар һәм кунаклар бик теләп катнаштылар. Уеннар концерт номерлары белән үрелеп барды. Һәм, әлбәттә инде, бәйрәмнең төп хуҗалары- Кыш Бабай һәм Кар Кызы белән очрашу булды. Бәйрәм күңелле дискотека белән дәвам итте.

Сатыш авыл җирлеге "Кыш бабайлар" парадында "Бизәлгән җигүле атлар" номинациясендә 1 урын алды. 

Сатыш авыл җирлегенә кергән барлык учрежденияләрдә Яңа елга әзерлек һәм бизәлеш эшләре тиешле дәрәҗәдә башкарылды.

Сәнгать һәм технология фәннәре атналыгы кысаларында Ш.З.Зиннуров исемендәге Сатыш урта гомуми белем бирү мәктәбендә укучылар белән төрле кызыклы чаралар үткәрелде. Шундыйлардан 5,6нчы сыйныф кызлары арасында үткән “Оста куллар” викторинасын, квадракоптерлар ярышын, “Машиналар тарихы” кичәсен, автомобиль модельләрен җыю ярышын санап китәргә була. Атналыкта кызлар үзләренең кул эшләренә осталыкларын  исбатласалар, егетләр исә техниканы ни дәрәҗәдә камил белүләрен күрсәттеләр.

Ш.З.Зиннуров исемендәге Сатыш урта гомуми белем бирү мәктәбе укучылары,  “#Бумбатл” Россиякүләм экологик акциясендә катнаштылар. Әлеге проектның төп максаты – үсеп килүче буында экологик культура формалаштыру.  Чара барышында мәктәп күләмендә барлыгы 663 кг кәгазь җыеп тапшырылды, иң актив класслар һәм укучылар мактау грамоталары белән бүләкләнде.