ЯҢАЛЫКЛАР

5 нче февраль көнне Иске Мичән мәдәният йортында  "Саба" ҖЧҖ "Мичән" бригадасының отчет җыелышы булып узды. Директор Шәймәрданов Рамиль Рафик улы һәм баш белгечләр 2024  елдагы эшләргә тирән анализ ясадылар, җитешсезлекләрне билгеләделәр, аларны төзәтү һәм камилләштерү юлларын күрсәттеләр, юбилиярларны котладылар, 2025 елга планнар билгеләделәр. ҖыелыштаТатарстан Республикасы Авыл хуҗалыгы һәм азык-төлек министрлыгының Саба муниципаль районы Авыл хуҗалыгы һәм азык-төлек идарәсе башлыгы Гафур Шәйхулла улы Хасаншин катнашты.

4 нче февраль көнне Килдебәк урта мәктәбендә Иштуган +Явлаштау, Симет+Мичән командалары 2025 елгы сезонда авыл җирлекләре  ирләр командалары (40+) арасында мини-футбол буенча Саба муниципаль районы чемпионатында катнашты.

3 нче февраль көнне Мичән авыл җирлеге гражданнары җыены булып узды. Җыен Иске Мичән авылы мәдәният йортында үткәрелде. Мәдәният йортына килә алмаган кешеләр җыенда «ZOOM» программасы аша, дистанцион рәвештә катнаша алдылар. Җыенда Саба муниципаль районы башлыгы урынбасары Р.Р. Закирҗанов, хокук саклау органнары вәкилләре, оешма-предприятия җитәкчеләре һәм вәкилләре катнашты. Җыелыш башында АҖ «Татмедиа»  һәм АҖ «Саба дулкыннары» әзерләгән видеоматериаллар каралды. 

Мичән авыл җирлеге биләмәсендә, ПМК “Мелиорация” оешмасы тарафыннан, арендалау өчен торак йорт төзелеше эше дәвам итә. Бүгенге көндә  түбәне калай белән ябу эшләре башкарыла.

25 нче гыйнвар көнне Мичән төп мәктәбе, Иске Мичән мәдәният йорты, Керәнне авыл клубы эшчеләре берлегендә төрле ВУЗ ларда укучы студентлар һәм 9-11 сыйныф укучылары арасында “Зачет” дигән КВН үткәрелде. КВН барышында яшьләребез төрле ярышларда катнаштылар, якты истәлекләр белән уртаклаштылар, җырлар башкардылар. Соңыннан үзләре әзерләгән күчтәнәчләр белән дусларча чәй эчү оештырылды. Бәйрәм дискотека белән төгәлләнде. Бу көн һәркем күңелендә озак сакланыр.

Мичән авыл җирлеге, Яңа Мичән авыл мәдәният йортында ПМК-159 тарафыннан ремонт эшләре башланып китте. Бина эчен җылыту, матурлау, уңайлаштыру өчен эчке яктан сүтү эшләре бара.

Мичән авыл җирлеге биләмәсендә, ПМК “Мелиорация” оешмасы тарафыннан,укытучы гаиләсенә арендалау өчен торак йорт төзелеше эше дәвам итә. Бүгенге көндә  түбә ябу эшләре башкарыла

"Саба" ҖЧҖнең Мичән бригадасында басуларга органик ашлама чыгарыла. Механизаторларыбыз бу эшләрне башкарып чыгу өчен көчләрен кызганмыйлар.

14 гыйнварда Килдебәк урта мәктәбе спортзалында 40+ авыл егетләре командалары арасында мини-футбол буенча турнирлар узды. Тимершык- Шыңар, Мичән-Симет командалары арасында ярышлар узды. Тимершык- Шыңар командасы җиңү яулады. Егетләргә алга таба да уңышлар телибез.

13 нче гыйнвар 2025 елда Иске Мичән мәдәният йортында “Яңа ел кичләре” дигән искечә Яңа ел бәйрәме үткәрелде. Бу бәйрәмгә иң актив авылдашлар  җыелды.