ЯҢАЛЫКЛАР

2023 нче елның 26  сентябрында Иске Мичәндә яшәүче Гатауллина Марзия Хаҗи   кызына 95 яшь тулды.

Гатауллина Марзия Хаҗи кызы 1928 нче елның 26нчы сентябрендә Арча районы Сеҗе авылында гади колхозчы гаиләсендә биш баланың иң олысы булып туа. 1-7нче классны Сеҗе мәктәбендә укый, шуннан 1943-1946нчы елларда Арча педучилищесында укып, укытучы һәнәрен үзләштерә.

“Сугыш башлангач, ир-егетләрне, хатын-кызларны сугышка алдылар. Безне Мәликә апа 7 класска кадәр укытты. Мәктәпне бетергәндә, без 26 бала идек. Мәликә апа, уку бетәр алдыннан, безгә: “Укучылар, укып бетерәсез, күреп торасыз, мәктәптә хатын-кызлар гына калдык, ир-егетләр фронтта. Киләчәктә укытучылар кирәк булачак. Барыгыз да әйбәт укыдыгыз, Арчага  педучилищега китүегезне сорар идем”, - диде. Без 26 укучыдан 14ебез  Арчага укырга барырга чыктык. Мәликә апа безгә, китәр алдыннан, дәфтәрләр һәм бер ручка, ике перо, карандаш өләшеп чыкты. Арчада тәртип нык саклана иде. Һәр көн зарядка ясый идек, маршка чыга идек. Сугыш еллары училищеда үтте. 14км. җәяү барып җәяү кайта идек, аркада каталка белән азык иде. Общежитие салкын булыр иде, төн чыкканчы чабата башларындагы карлар эреп бетми иде.” – дип сөйли.

Укып бетереп кайткач, Керәнле мәктәбендә 1нче классны кабул итә, анда 43 бала була. Беренче классны укытып бетергәч, Иләбәр мәктәбенә эшкә җибәрәләр. Алдагы елларда Иске  Мичән белән Бакшанды мәктәпләрендә рус телләре укыта. Гөберчәктә, Казаклар мәктәбендә 4 ел укыта. 1955нче елдан пенсиягә чыкканчы, Иске Мичән авылында мәктәптә укыта. 1949 нчы елда Иске Мичән егете Гатауллин Хөснуллага кияүгә чыга. Җиде бала үстерәләр. Балалары тормышта үз юлларын табалар. Бүгенге көндә төпчек улы Мөнир тәрбиясендә яши.

16 сентябрь көнне Мичән авыл җирлегендә "Милләтләр кроссы-2023", "Татарстан кроссы -2023" йөгерү ярышы оештырылды. Төп белем бирү мәктәпбе укучылары, җирлектәге бюджет оешмалары җитәкчеләре һәм эшчеләре, шулай ук теләгән һәркем катнашты. Җиңүчеләргә Мактау грамоталары һәм медальләр тапшырылды.Ярыштан соң барлык катнашучылар тәмле коймак һәм чәй белән сыйландылар.

Чәчәкләр дөньяның мәңгелек матурлыгы символы. Алар безнең тормышыбызны баерак һәм шатлыклырак итә, бездә яхшылыкка, матурлыкка мәхәббәт уята. Яңа Мичән мәдәният йортында авыл китапханәсе белән берлектә "Чәчәкләр-табигатьнең Бөек бүләге" дип исемәнгән әдәби - музыкаль кичәсе уздырылды. "Гөлләрем, чәчкәләрем" дип исемләнгән китап күргәзмәсе тәкъдим ителде һәм китапларга күзәтү үткәрелде. Чара төрле конкурслар, уеннар, чәчәк темасы буенча викторина белән дәвам итте, анда катнашучылар чәчәкләр турында легендаларны, чәчәкләр искә алынган әдәби әсәрләрне искә алдылар, чәчәкләр турында җырлар һәм шигырьләр башкардылар. Чәй өстәле артында өй үсемлекләрен үстерү тәҗрибәсе, чәчәкләр белән бәйле тормыш хикәяләре белән уртаклаштылар. Бу очрашу катнашучылар өчен игелек, матурлык һәм яхшы кәеф чыганагы булды.

"Саба" ҖЧҖ “ Мичән” бүлекчәсендә маллар өчен кукуруздан силос әзерләнә. Бүгенге көнгә 25 гектар кукуруз җиреннән 300 тонна сусыл азык әзерләнгән.

Бүгенгесе көндә "Саба"җаваплылыгы чикләнгән җәмгыятенең “Мичән” бүлечәсендә бәрәңге алу эшләре дәвам итә. Бүгенге көнгә 21 гектар җирдән 405 тонна бәрәңге уңышы алынды.

Яңа Мичән мәдәният йорты хезмәткәрләре Аглиевлар гаиләсендә булдылар. Аларның уллары-махсус хәрби операциядә катнаша.

9 сентябрьдә Яңа Мичән мәдәният йортында, авыл китапханәсе белән берлектә, "Бигрәк тәмле бәрәңге" бәйрәме үткәрелде. Бәйрәмдә конкурслар, викториналар, җырлар һәм Бәрәңге турында шигырьләр бар иде. Алдан ук бәрәңгедән ризыклар әзерләүгә конкурс игълан ителде. Ни генә юк иде өстәлдә: пироглар, өчпочмаклар, курниклар, мундирлы бәрәңге,  бәрәңге салатлары. Шулай ук төрле сортлардан һәм гадәти булмаган формадагы бәрәңгедән күргәзмә һәм "Эх, бигрәк тәмле бәрәңге" дип исемләнгән китап күргәзмәсе оештырылды. «Иң оригиналь ризык» конкурсында җиңүчеләргә бүләкләр тапшырылды. Бәйрәм ахырында барлык килгән кунаклар чәй һәм бәрәңгедән ясалган ризыклар белән сыйландылар.

12 нче сентябрь көнне Керәнле авылы клубы, Яңа Мичән мәдәният йорты, Мичән авыл китапханәсе  берлектә,  Укытучылар һәм остазлар елы  кысаларында, олы  хөрмәткә лаек ветеран укытучылар белән "Укытучы- нинди изге исем! -"Әни”  сүзе кебек кадерле!" дип исемләнгән музыкаль очрашу кичәсе уздырдылар. 

Милли мәдәниятләр һәм традицияләр елы кысаларында, 6 сентябрьдә Яңа Мичән  авыл китапханәсендә  мәдәният йорты сәнгать җитәкчесе  белән берлектә "Күркәм кием - тән зиннәте" исеме астында тематик сәгать үткәрелде. Чара кунаклары - "Милли киемнар"конкурсында катнашучылар. Чара барышында  татар милли костюмының матурлыгы турында сөйләнде, күргәзмә белән таныштырылды, кием тарихлары турында сөйләнелде.Ахырда конкурста катнашучыларга рәхмәт белдерелде, дипломнар бирелде.Катнашучылар үзләренең яраткан киемнәре турында да сөйләделәр. Чара чәй эчү белән тәмамланды.

1 нче сентябрьдә Мичән төп мәктәбендә белем бәйрәменә багышланган тантаналы линейка булып узды. Тантаналы линейкада укучыларның әти-әниләре, авыл җирлегендәге оешма җитәкчеләре, район вәкилләре катнашты. Алар укучыларны белем бәйрәме белән котладылар һәм укуда уңышлар теләделәр.