ЯҢАЛЫКЛАР

Олы Шыңар авыл җирлегенә караган торак пунктларда халыктан җыйналган үзара салым хисабына авыл юлларын ремонтлау эшләре төгәлләнде. Кече Шыңар авылында Комсомол урамының 168 м өлеше, Олы Шыңар авылында Такташ урамының 187м, Оет авылында Кооператив урамының  97 м   өлеше ремонтланды. Юл ремонтлау эшләрен «Рамазан» ААҖ оешмасы  башкарды.

Кече Шыңар мәдәният йорты һәм китапханә хезмәткәрләре "Җыр-биюле кичке уеннарга, болыннарга кайтам чор аша" проекты кысаларында  Олы Шыңар авылында кичке уен оештырдылар. Аның максаты-халык традицияләрен саклау һәм дәвам итү. Кичке уеннар-бик күп кешеләрнең исләрендә онытылмаслык һәм якты вакыйга булып саклана.

Олы Шыңар авыл җирлегендә   үзара салым акчасына  Чулпыч авылы зиратында хуҗалык кирәк-яраклары өчен корылма эшләнде. Эшләрне  Саба ПМК «Мелиорация” ҖЧҖ башкарды.

Кече Шыңар авыл мәдәният йортында студентлар һәм яшьләрнең "өйгә юл" дип исемләнгән традицион концерты булып узды. Яшьлек-өметләр һәм ачышлар чоры, ә яшьләр - яңа  идеяләр генераторы. Июль кичәсе көчле энергетика, дәртле биюләр, популяр җырлар белән баетылды. Концертны алып баручылар катнашучыларны "кызыл келәм" буенча үткәрделәр, ул җыр-бию, күңелле конкурслар һәм куренешләр белән тулы сәхнәгә алып барды. Традицион концертта яшь башкаручылар, яшүсмерләр, иҗат коллективлары катнашты.

1 август көнне Кече Шыңар мәдәният йорты, китапханә хезмәткәрләре, Олы Шыңар авылыннан Ахунҗановлар нәселе белән берлектә, Бөтендөнья татар конгрессының Vlll съездында катнаштылар, конгресс кунаклары алдында "Казан Экспо"  үзәгендә  "Гасырлар кайтавазы - гаилә тарихында" дигән 3 нче мәйданчыгында чыгыш ясадылар. Коллектив Ахунҗановлар гаиләсе тарихына багышланган музыкаль-әдәби композиция тәкъдим итте.

17июль   көнне Оет авыл мәчетендә Корбан ашы мәҗлесе үткәрелде. Мәҗлескә авыл халкы, кайткан кунаклар, балалар -  100дән артык кеше җыйналды. Мәҗлестә катнашучылар үзләре үк иганәчеләр дә булдылар. Мәҗлес барышында имам-хатиблар вәгазь сөйләде, догалар һәм аятьләр укылды,  җәмәгать белән   намаз укылды.

Гаилә, мәхәббәт һәм тугрылык көне – бу бәйрәмне һәр гаилә, һәр йорт куанып каршы ала. Кече Шыңар мәдәният йорты хезмәткәрләре 8 июль көнне шушы уңайдан котлау акциясе үткәрделәр, быел көмеш туйларын билгеләп үткән парларны тәбрикләделәр, мәхәббәт һәм тугрылык символы булган ромашка букеты бүләк иттеләр.

Хәрби хезмәткә язгы чакырылыш-ул ел саен үткәрелә торган процесс, анда 18 яшьтән алып 27 яшькә кадәрге яшьләрне "Хәрби бурыч һәм хәрби хезмәт турында"гы закон белән регламентлана торган мәҗбүри хәрби хезмәткә озаталар. Быел Олы Шыңар авыл җирлеге буенча Гайнетдинов Илгизәр һәм Шәяхмәтов Раил Армия сафларына чакырылдылар. Ә менә дүрт солдат - Хөснуллин Илназ, Мәхмүтов Әлфис, Нәбиуллин Гадел, Гарипов Рафис армия сафларында хезмәт итеп, Ватан алдындагы бурычларын үтәгәннән соң өйләренә кайттылар. Аларны дуслары, туганнары шатланып каршы алды.

Саба район китапханәсе 2021 елдан башлап, чишмәләрне ачыклау һәм саклау, аларның тарихын искә алу, гореф-гадәтләрен яңарту, халыкны чишмәгә җәлеп итү максатыннан, "Саф сулы ямьле Саба" проектын тормышка ашырды. Шул уңайдан 24 июнь көнне Кече Шыңар авылы чишмәсе янында "Җир ананың зәңгәр күзләре"дигән чишмә бәйрәме үткәрелде.

Олы Шыңар авыл җирлеге бюджет оешмалары  "Хәтер шәме" акциясендә катнаштылар