ЯҢАЛЫКЛАР

Олы Кибәче авыл җирлегендә җирле әһәмияттәге автомобиль юллары төзекләндерелде. Эшләр гражданнарның 2023 елга каралган үзара салым акчасы хисабына Олы Кибәче авылының Октябрьская урамында башкарылды. Юлларны ҖЧ "Рамазан" оешмасы төзекләндерде.  

Сатыш авылында "Тату сыйныф серләре" республикакүләм конкурсының зона этабы булып узды. Олы Кибәче урта мәктәбенең 7 нче сыйныф укучылары һәм аларның әти-әниләре әлеге конкурста катнашып, "Иң тату сыйныф" номинациясендә җиңү яуладылар. Алар тату сыйныф серләрен тулысы белән ачып бирүгә ирештеләр.

Олы Кибәче авыл клубында "Әни җирдә иң кадерле кеше" дигән исем астында безнең һәм күрше авылларның үзешчән сәнгать артистлары катнашында концерт булды. Ул җир йөзендәге иң бөек затлар - Әниләр көненә багышланган иде.

Олы Кибәче урта мәктәбендә, Әниләр көненә багышлап, спорт уены оештырылды. Әниләр ике командага бүленеп, төрле кызыклы уеннар уйнадылар. Уеннар концерт номерлары белән аралашып барды.

Бураннардан авыл юллары кар көртләре белән капланды. "Саба" ҖЧҖ Кибәче бригадасы тракторчысы Гайнетдинов Илнар Т-150 тракторы белән урамнарны кардан чистартты. 

Олы Кибәче авылында Шакировлар гаиләсендә дүртенче бала туды. Малайга Инсаф дип исем куштылар. Сабыйга бәхетле озын гомер, сәламәтлек телибез. Шакировлар гаиләсен шушы күңелле вакыйга белән котлыйбыз һәм иң изге теләкләребезне җиткерәбез! 

"Кибәче" командасы ир-егетләр командалары арасында мини-футбол буенча район чемпионатында катнашты. "Сабантуй" командасына каршы уйнап 5:1 исәбе белән җиңү яуладылар. Егетләрне беренче җиңүләре белән котлыйбыз һәм алдагы уеннарда уңышлар телибез!

Олы Кибәче авыл клубында Айдар Фәтхетдинов һәм аның иҗатташ дуслары "Туганлык сере" дип аталган концерт программасы белән чыгыш ясадылар.

Олы Кибәче авылына Тимершык урта мәктәбеннән бер төркем ветеран укытучылар кунакка килде. Алар Олы Кибәчедә яшәүче ветеран укытучылар Рузалия Зыятдин кызы һәм Рафил Әхмәт улы Сафиннар белән очрашты. Авылыбыз мәчетендә һәм чишмәдә экскурсиядә булдылар.

2023 елның 10 ноябрендә Олы Кибәче урта гомуми белем бирү мәктәбендә башлангыч мәктәп укучыларын Россия бөркетләре оешмасына багышлау тантанасы узды, алар Россия балалар һәм яшьләр хәрәкәтенең беренче баскычы булып тора. Бу тантаналы һәм дулкынландыргыч көн иде. Олы Кибәче авыл җирлеге башлыгы Сафин Айрат Камил улы, тәрбия эшләре буенча директор урынбасары Камалова Диләрә Рушан кызы һәм башлангыч сыйныф укытучылары балаларга үгет-нәсихәт сүзләре белән мөрәҗәгать иттеләр. Тантаналы ант, "Россия бөркете" билгеләрен тапшыру, мавыктыргыч флешмоб, болар барысы да бәйрәмдә катнашучыларны дулкынландырды һәм озак вакыт хәтердә калачак. Чөнки "бөркет" булу-ул һәрнәрсәдә һәм һәрвакыт алда булу, үзендә Ватанга мәхәббәт, хезмәт сөючәнлек һәм белемгә омтылу, намуслылык һәм затлылык, тыйнаклык, дисциплиналылык һәм иптәшлек тәрбияләү дигәнне аңлата.