ЯҢАЛЫКЛАР

24 март көнне Кызыл-Мишә мәдәният йорты һәм китапханә хезмәткәрләре «Хуш киләсең, Нәүрүз!» дигән бәйрәм тамашасы үткәрделәр. Авыл мәдәният йорты  янына бик күп кеше җыелды. Бу тамашага бай һәм эчтәлекле программа әзерләнгән иде.  Бәйрәмнең төп кунагы  Нәүрүзбикә килде, ә Кыш бабай Нәүрүзбикәгә үзенең биләмәләрен калдырырга  теләмәде. Авыл халкы алар белән бергә кышны озатты һәм язны каршы алдылар. Чарада катнашучылар җырладылар, биеделәр, яз турында табышмакларга җавап бирделәр, тәмле чәй эчтеләр, коймак һәм ботка белән сыйландылар. Кыш белән  язның ике командасына бүленеп, барысы да уен-ярышларда катнаштылар һәм бүләкләр алдылар. Бу чара катнашучыларда бәйрәм атмосферасы һәм күтәренке кәеф тудырды. 

2021 елның 21 мартында  Тимершык авыл җирлегендә  Гараев Ильнур Габделбар улы истәлегенә дүртенче тапкыр традицион волейбол ярышы оештырылды. Уенга ир-егетләр арасында 12 команда катнашты. 1 призлы урынны  Әтнә районы Көнгәр авылы командасы, 2 призлы урын Тимершык авылы, 3 призлы урынга  Әтнә районы “Шахтёр”  командалары лаек булды, командалар мактау грамоталары һәм иганәчеләребезнең акчалата призлары белән бүләкләнделәр.

Яз үз хокукларына керә. Ә аның белән бергә якты, язгы «Нәүрүз»  бәйрәме дә килә. Нәүрүз бәйрәме никадәр күңелле булса, табигать кешеләргә шулкадәр юмарт булачак. Шуңа күрә бу көнне кешеләр рәхәтләнеп күңел ачалар, яз килүгә шатланалар, сыйлар әзерлиләр, кунакка йөрешәләр. Бу бәйрәм безнең авыл халкы өчен дә матур традициягә әверелде.    20 март көнне Тимершык мәдәният йорты хезмәткәрләре көче белән «Нәүрүз» үткәрелде. Яз бәйрәме җырлар, биюләр, спорт ярышлары һәм күңелле уеннар белән дәвам итте. Чара ахырында барлык катнашучыларны учак ягып казанда пешерелгән  кайнар «Карга боткасы»  көтә иде.

Хәзерге вакытта кешеләргә карата түземле мөнәсәбәт проблемасы аеруча актуальгә әйләнде. Сер түгел, бүгенге көндә кешеләр арасында битарафлык һәм мәрхәмәтсезлек күбрәк таралган. Кешеләргә яхшы кәеф өстәү, алар арасында яхшы мөнәсәбәтләр булдыру максатыннан, 19 март көнне Кызыл-Мишә мәдәният йорты һәм китапханә хезмәткәрләре “Мәрхәмәтлелек елмаюдан башлана!” дигән девиз астында “Мәрхәмәтлелек смайликлары” акциясе уздырдылар. Елмаюны сатып алып булмый, аны бүләк итеп кенә була.  Шуңа күрә алар бик күп кызыклы смайликлар ясадылар. Әзерләнгән смайликлар – яхшы кәеф символларын үтеп баручыларга, балаларга һәм аларның әти-әниләренә бүләк иттеләр. Бу чарадан барысы да уңай эмоцияләр алды. Акция үзенең төп максатына иреште, күп кенә уңай кәеф һәм әлбәттә, елмаюлар алып килде.

Тимершык авыл җирлегендә хуҗалыклардан көнкүреш калдыклары җыю, эчәргә яраклы су системасының төгәллеген, төзеклеген МПП ЖКХ Шемордан оешмасы тәэмин итә. Алар үз эшләрен вакытында, төгәллек белән башкарып үтиләр.

Шәмәрдән авыл җирлегендә хезмәт коллективлары, авыл җирлекләре һәм шәхси эшмәкәрләр арасында волейбол буенча Саба муниципаль районы Чемпионатының зона этабы тәмамланды. Тимершык авыл җирлеге командасы 2 нче урынны алды һәм финалга чыкты.

6 март көнне Кызыл-Мишә мәдәният йортында, китапханәче белән берлектә, 8 Март – Халыкара хатын-кызлар көненә багышланган «Киленнең – кызганнары, кызларның – уңганнары» дип исемләнгән бәйрәм концерт-конкурсы булып узды. Бу көнне тамаша залы язгы кәеф атмосферасына, тамашачыларның елмаюларына,  шатлыкларына бай булды. Концертны алып баручылар: китапханәче Әүхәдиева Г. һәм мәдәният йорты мөдире Гаттарова С. барлык катнашучыларны якынлашып килүче яз, мәхәббәт һәм өмет бәйрәме белән котладылар, аларга сәламәтлек, иминлек, язның үзе кебек якты һәм шатлыклы көннәр теләделәр. Конкурста катнашучы кызлар һәм киленнәр – Хәбибуллина Әдилә, Шагабиева Дилә, Гаттарова Айгөл, Сабирова Әлфия, Гаттарова Ләйсән һәм Мөбәрәкова Фәридә үзләренең талантларын күрсәттеләр һәм тамашачыга бүләк иттеләр. Тәкъдим ителгән төрле-төрле биремнәрне конкурсантлар җиренә җиткереп үтәделәр. Киленнәрнең һәм кызларның чыгышларын Альфред Фәхриев, Таңсылу Галимова, Айдар Хантимиров, Нурия Вәлиева музыкаль номерлар белән бизәделәр. Конкурста катнашучыларның барысына да истәлекле бүләкләр тапшырылды. Бәйрәм чарасы тамашачыларда уңай эмоцияләр калдырып,  бер сулышта узды.

Яз ул – яңа тормышның башы, ул елмаюлар, матурлык, кояш һәм, әлбәттә, фантазияләр чоры! Кыш-анабыз әле саубуллашырга җыенмаса да, балалар да, өлкәннәр дә кояшның җылы нурлары, беренче чәчәкләр, кошлар җырлавы турында хыяллана. Күптән көтелгән яз инде безнең ишекләргә килеп кага, безнең күңелләргә күтәренкелек, шатлык, оптимизм һәм уңай эмоцияләр өсти. 5 март көнне Кызыл-Мишә мәдәният йорты һәм китапханә хезмәткәрләре 3 сыйныф укучылары белән «Туган авылымда – яз!» дип исемләнгән рәсем конкурсы үткәрделәр. Балалар китапханәче белән бергә язның төп билгеләрен, язгы айларны кабатладылар, табигатьтәге күзәтүләр белән уртаклаштылар, бу матур ел фасылына багышланган табышмакларга җаваплар таптылар. Рәсем конкурсына балалар иҗади яктан якын килеп, ачык һәм матур рәсемнәр ясадылар, үзләренең эшләрендә язгы кәефләрен чагылдырдылар.

2 март көнне Кызыл-Мишә мәдәният йортында, китапханәче белән берлектә, балалар  өчен “Мәрхәмәт елмаюдан башлана” дигән темада тәрбия сәгате үткәрелде. Балалар татар халкының “Өч кыз” әкияте, Ш.Галиевның “Рәхмәтләр хакында” һәм А.Босевның “Трамвайда” шигырьләре белән танышып, яхшылык һәм явызлык турында фикер алыштылар. Чараның икенче өлешендә балалар белән җырлы-биюле халык уеннары уйналды.

Тимершык авыл җирлегендә халыкның үз вакытын файдалы үткәрү өчен барлык мөмкинлекләр тудырылган. Җирлек халкы актив рәвештә төрле спорт төрләре белән шөгыльләнә.