ЯҢАЛЫКЛАР

22 нче февраль көнне Тимершык авылында яшәүче Нотфуллина Нәзимә 90 яшьлек туган көнен билгеләп узды. Аны котлап җирле үзидарә һәм колхоз идарәсеннән вәкилләр әзерләнгән бүләк, күчтәнәчләр тапшырдылар. Алга таба да кәдер, хөрмәттә яшәвен телибез.

20 февраль көнне Кызыл-Мишә мәдәният йортында китапханәче белән берлектә «Ватанны  саклаучылар» көненә багышланган чара уздырылды. “Егетләребез дә уңган, кияүләр искитәрлек” дигән бәйге-кичәдә егетләр һәм кияүләрдән торган “Заман егетләре” һәм “Баҗайлар” дигән ике команда катнашты. Катнашучы ир-егетләребез  бәйге шартлары буенча төрле биремнәр үтәделәр, кызыклы, көтелмәгән сорауларга җавап бирделәр, тел турындагы мәкальләрне дәвам иттеләр. Бәйгеләр арасында үзешчән сәнгатьтә катнашучылар үзләренең иң яхшы номерларын күрсәтеп тамашачыларны куандырдылар. Соңыннан тамашачылар үзләре дә матур итеп күңел ачтылар, рәхәтләнеп биеделәр.

2021 елның 9 нчы феврале көнне Көек авылы клубында “Көек” ҖЧ җәмгыятенең  2020 елгы эшчәнлек нәтиҗәләре буенча хисап җыены булып узды. Хуҗалык җитәкческе Хкрамшин Фәнис Шайхразый улы һәм җаваплы специалистлар эшчәнлеккә тулы анализ ясадылар, 2021 елга планнар билгеләделәр.  Җыелышта Саба муниципаль районы буенча авыл хуҗалыгы җитәкчесе урынбасары Харисов Раиф Вазиф улы  катнашты.

2021 елның 12 февраль көнне Тимершык авыл җирлеге территориясендә «Россия Чаңгы юлы 2021» - «Татарстан Чаңгы юлы 2021»  массакүләм чаңгы ярышлары булып узды. Бу ярышлар халыкны спорт белән шөгыльләнүгә җәлеп итү һәм иң көчле чаңгычыларны ачыклау максатыннан оештырылды.

Ватаннан читтә хезмәт бурычын үтәгән россиялеләрне искә алу көнен безнең илдә 15 февральдә билгеләп үтәләр. Бу дата совет гаскәрләрен Әфганстаннан чыгаруга 32 ел тулуга багышланган. 12 февраль көнне, Әфганстанда хәрби бурычларын үтәгән, фидакарьлек, батырлык күрсәтүчеләргә хөрмәт йөзеннән, Кызыл-Мишә мәдәният йортында ,Саба интернат-мәктәбе укучылары өчен, «Ватан чикләрендә сугышкан кешеләрне искә алыйк» дип исемләнгән батырлык дәресе үткәрелде. Әфганстан – безнең төзәлмәс ярабыз. Безнең солдатлар ил җитәкчелеге куйган бурычларны үтәп, үз гомерләрен бирделәр. Авыл мәдәният йорты мөдиренең Әфганстан турында сөйләве «15 февраль - Әфганстаннан гаскәрләрне чыгару көне. Сугышчы-интернационалистларны искә алу көне " дип исемләнгән презентация белән үрелеп барды. Укучылар Совет гаскәрләрен Әфганстанга кертүнең сәбәпләре, совет гаскәрләренең һәм Әфганстан гаскәрләренең уртак хәрби гамәлләре, совет сугышчыларының батырлыгы, җирле халыкка алар тарафыннан күрсәтелгән ярдәм турында белделәр. Барлык катнашучылар да бу сугышта һәлак булганнарны бер минут тынлык белән искә алдылар.

Саба районы, Тимершык авыл җирлегенә  кергән Миңгәр авылында балык тотар өчен сулыклар күп. Кыш көннәрендә дә балыкчылар үз  шөгыльләренә  тугры  калып боз тишеп балык тоталар.

Саба районың  авыл җирлекләрендә  яшь белгечләрне тораклы итү һәм авыл җиренә  квалификацияле белгечәр тарту максатыннан Республика күләм “Яшь белгечләргә аренда торагы” программасы кысаларында йортлар төзелеше дәвам итә Тимершык авылында авыл хуҗалыгы белгечләре өчен чираттагы йорт төзелә.

2020 елдан башлап Татарстанда "Авыл территорияләрен комплекслы үстерү"дәүләт программасы гамәлгә ашырыла. Программа, аерым алганда, авыл халкын үтемле һәм уңайлы торак белән тәэмин итү өчен шартлар тудыруны, кадрлар потенциалын үстерүне, инфраструктураны булдыру һәм үстерү һ. б. күздә тота.

Программада авыл җирендә даими яшәүче, яшәү урыны буенча мәҗбүри теркәлүче һәм оешма эшчәнлеге өлкәсенә бәйле рәвештә бер елдан да ким булмаган авыл җирлегендә эшләүче гаилә яки РФ гражданы катнаша ала.

Субсидия күләме федераль һәм республика бюджетлары акчалары хисабына торак бәясенең 80 % ын тәшкил итә.  җирле бюджет акчалары һәм (яки) эш бирүче – кимендә 20 % (җирле бюджет 1%+ эш бирүче 19%).

Төзелгән торак эш бирүченең финанс катнашында муниципаль милеккә яки уртак (җирле үзидарә органына һәм эш бирүчегә) рәсмиләштерелә һәм гражданга найм шартларында файдалануга тапшырыла.

Шәхес хезмәт килешүе буенча 5 ел эшләгәннән соң, тиешле эш бирүче белән торак урынын исәп – хисап бәясенең 10% тан артмаган бәядән, ә 10 ел узгач-1% тан артмаган бәядән сатып алырга хокуклы.

     Бүгенге көндә Тимершык авыл җирлегендә дә шушы программага нигезләнеп 7 гаиләгә йорт төзелеше алып барыла.

5 февраль көнне  Тимершык авыл җирлегенең отчет җыены булып узды. Җыенда Саба муниципаль районы Башлыгы урынбасары Р.Р. Закирҗанов, хокук саклау органнары вәкилләре, оешма җитәкчеләре  катнашты. Җыелыш башында «Татмедиа» АҖ һәм «Саба дулкыннары» АҖ әзерләгән видеоматериаллар каралды. Җыенның көн тәртибе түбәндәгечә булды:

1. Тимершык  авыл җирлегендә урнашкан учрежденияләрнең 2020 елда башкарылган эшләренә анализ һәм 2021 елга эшләрен камилләштерү буенча планнары.
2. Участок полиция хезмәткәре Гатин Марат Мөрсалим улы чыгышы.
3. Янгынга каршы күзәтчелек бүлеге җитәкчесе Галимуллин Айнур Рифкат улы чыгышы
4. Урманнарда янгын куркынычсызлыгы турында урман хуҗалыгы участок инспекторы Газизҗанов Ришат Альберт улы чыгышы.
5. Саба районы ветеринария берләшмәсе җитәкчесе Ганиев Зөлфәт Рифкат улы чыгышы.
6. Сабадагы «Россельхозбанк» өстәмә офис җитәкчесе Билалова Рәзинә Кәшәфетдин кызы  чыгышы.
7. Тимершык авыл җирлеге советының 2020 нче елга отчеты һәм 2021 елга планнары.
8. Узган елгы отчет җыенында халыкның биргән сораулары, тәкъдимнәрнең үтәлеше һәм 2021 елга халыктан сораулар.
9. Саба муниципаль районы Башлыгы урынбасары Закирҗанов Расих Рәхимҗан улының  йомгаклау чыгышы.

2 февраль көнне Кызыл-Мишә мәдәният йорты һәм китапханә хезмәткәрләре,

3 сыйныф укучылары белән “Зирәкләр турниры” дип исемләнгән интеллектуаль уен үткәрделәр.Әлеге чараның максаты – иҗади сәләтне һәм логик фикерләүне үстерү, туган телгә мәхәббәт тәрбияләү. Катнашучылар төрле биремнәр үтәделәр: ребуслар, кроссвордлар, анаграммалар чиштеләр . Балалар һәр биремне зур кызыксынучанлык белән активлык күрсәтеп эшләделәр.