ЯҢАЛЫКЛАР

Иҗат сезонын ачу кысаларында, 6 ноябрь көнне Кызыл-Мишә мәдәният йортында “Бердәм булыйк!” дигән бәйрәм концерты булып үтте. Авыл халкы сәхнәгә чыккан артистларны көчле алкышлар белән каршы алды һәм озатып калды. Яраткан тамашачыбызга һәм үзешчән сәнгать артистларына зур рәхмәтебезне җиткерәбез.

4 ноябрь көнне Кызыл-Мишә мәдәният йорты хезмәткәрләре һәм китапханәче балалар өчен «Бердәмлектә-көч» дип исемләнгән конкурс-уен программасы үткәрделәр. Чарада урта һәм кече яшьтәге мәктәп балалары катнашты. Программа башында балалар белән «Халыклар бердәмлеге көненә» багышланган рәсем конкурсы үткәрелде һәм «Без бергә» дигән стенгазета чыгарылды. Аннан соң алар белән туплы эстафета уеннары оештырылды, анда балалар үзләренең спорт, акыл сәләтләрен һәм күнекмәләрен күрсәтә алдылар. Үз командалары өчен җиңүгә ирешү теләге балаларны шулкадәр җәлеп итте ки, алар вакыт узганын сизми дә калдылар. Барысы да финишка беренче булып килергә тырыштылар.

Тирә якны төзекләндерү максатыннан Тимершык авыл җирлеге буенча иске йорт, каралты кура сутү эшләре даими үткәрелеп тора.

Тимершык  авыл җирлеге буенча чишмәләрне төзекләндерү эшләре бара. Тимершык авылында “Изгеләр” чишмәсе территориясенә дренаж ясалды, Миңгәр авылында иске чишмә сүтелеп яңа чишмә төзелешенә әзерлек бара.

29 октябрь көнне Кызыл-Мишә мәдәният йорты һәм китапханә хезмәткәрләре балалар өчен «Кул-аякларыгызны саклагыз – юлда шаярмагыз!» дип исемләнгән танып-белү уены үткәрделәр. Башта Светофор балаларга светофорның барлыкка килү тарихы турында сөйләде. Соңыннан балаларга юл йөрү кагыйдәләре буенча викторина тәкъдим итте. Балалар табышмаклар чиштеләр һәм юл билгеләре пазллары җыйдылар. Алар юл хәрәкәте инспекторы белән берлектә трамвай, автобус  һәм троллейбусны ничек дөрес итеп әйләнеп чыгарга, велосипедта кайсы яшьтән юл буйлап йөрергә мөмкин булуын, ә кайда уйнарга ярамавын искә төшерделәр. Шулай ук балалар китапханәдә булган юл йөрү кагыйдәләре турындагы китаплар һәм журналлар белән таныштылар.

   Тимершык авылында Мишә елгасы аша үтүче асылмалы басмага эшмәкәр иганәчеләребез Ибрагимов Эльмир, Исмагилов Дамир  һәм дә битараф булмаган авыл халкы булышлыгы белән ремонт ясалды.

Социаль учреждениеләрдә мөмкинлекләре чикләнгән кешеләргә уңайлыклар тудыру максатыннан Көек авыл клубының керү юлына иганәчеләр ярдәме белән пандус урнаштырылды.

14 октябрь көнне Кызыл-Мишә мәдәният йортында, китапханә белән берлектә, “Сүзләр белән уйныйбыз” дигән исем астында викторина үткәрелде. Викторинада башлангыч мәктәп укучылары катнашты. Балалар ребуслар, табышмаклар, кроссвордлар чиштеләр, мәкальләр дәвам иттеләр, сүзләр төзеделәр. Әлеге чара балаларга сүзлек запасын тулыландырырга, сүзләр төзелешенең яңа якларын ачарга ярдәм итте.

Саба районының  авыл җирлекләрендә  яшь белгечләрне тораклы итү һәм авыл җиренә  квалификацияле белгечәр тарту максатыннан Республика күләмендә “Яшь белгечләргә аренда торагы” программасы кысаларында йортлар төзелеше дәвам итә.Чираттагы йорт Тимершык авылында авыл хуҗалыгы белгечләре өчен төзелә.

Көек авылы... Насыйх чишмәсе... Бу чишмәгә исемне , авылдашлары аны соңгы юлга озатырга килгәч тәкдим иттеләр. Аның вафатыннан соң чишмәгә элмә тактасы эленде.

       Моннан ике дистәдән артык еллар элек, ерактагы тау итәгеннән агып яткан чишмәне ул авыл уртасына сузып эшләп куйды. “Менә без картаеп барабыз, анда кадәр барып су алып кайтырга көчебез җитмәс, кызыма да эштән кайткан-киткән арада су кертеп чыгарга җайлы, авылда калган өлкәннәр өчен дә уңайлы булсын”, -дип эшләде ул аны.  Ишегалдында кое торса да, үзе шул чишмә суын ярата иде шул. Чынлап та , тирә яктагы чишмәләр арасында иң шифалы, саф сулы санала ул. Аны урнаштырган урын да бик уңайлы, авыл уртасында булды- авыл халкы гына түгел, тирә-яктагы авыллардан, Саба, Шәмәрдән якларыннан кешеләр шул чишмәгә килеп су алалар. Менә шушы арада, чишмәне тагын матурлау максатыннан,  өч кызы тәкдиме белән чишмәгә матур һәм зур итеп бизәкле самовар куелды. Аларга кияүләре, оныклары кушылды. Ул көнне алар өчен чын бәйрәм булды, туган нигезләренә кайтып мич коймагы пешереп өстәл әзерләделәр. Морҗа башыннан чыккан төтенгә, чыр-чу килеп уйнап йөргән балаларга  карап авыл халкы аларның бердәмлегенә сокланды. “Әтиебезнең эшен дәвам итеп, авыл халкына бүләгебез булсын бу. Чишмәбезнең суы беркайчан саекмасын, һәрвакыт шулай кеше өзелмәсен, анда килгән саен матурлыкка карап сокланып ,ял итеп китәрлек булсын”, -дип телиләр алар.

Чишмәләр авылларыбызның горурлыгы. Безнең Тимершык авылы җирлегендә дә яңалары гел төзелеп, булган чишмәләр яңартылып тора. Бигрәктә бу эшләргә, тарихны барлап халык актив кушыла.