ЯҢАЛЫКЛАР

14 нче гыйнвар көнне Мингәр авылында яшәүче Зиннурова Сөембикә Мөхәммәди кызы 90 яшьлек юбилеен билгеләп үтте. Юбилярга  Саба муниципаль районы Башкарма комитеты аппараты җитәкчесе М.Р. Кәримов Россия Президенты котлавын тапшырды.  Шулай ук Сөембикә апаны Саба районы социаль яклау бүлеге җитәкчесе М.М.Хузин hәм Тимершык авыл җирлеге башлыгы А.Х.Хаҗиев та котладылар.

12 нче гыйнвар көнне Тимершык мәдәният йортында мәдәният хезмәткәрләре тарафыннан балалар өчен Яңа ел үткәрелде. Чара кызыклы уеннар, лоторея һәм җыр -биюләр белән үрелеп барды.

2020 елның 12 гыйнварында Тимершык авыл шугалагында Гәрәев Илнур Гәбделбәр улы истәлегенә багышланган хоккей ярышы үткәрелде. Ярышта 5 команда катнашты. 1 нче призлы урынны Саба Ветераннар командасы, 2 нче призлы урынны Тимершык командасы, 3 призлы урынны Шәмәрдән хоккейчылары яулады. Җиңүчеләр кубок, грамота һәм акчалата бүләк белән бүләкләнделәр.

5 гыйнвар көнне Кызыл-Мишә мәдәният йорты һәм китапханә хезмәткәрләре кышкы каникул көннәрендә балаларны  "Яңа елны бергә каршылыйбыз" дип исемләнгән уен программасына чакырдылар. Анда алар ел символы күсе белән тылсымлы әкият дөньясына сәяхәт ясадылар.  Яңа ел тематикасына бәйле әкиятләрне искә төшерделәр, табышмаклар чиштеләр, әкият персонажларын белү буенча интеллектуаль викторина сорауларына җавап бирделәр. Шулай ук «Кыш турында шигырь», «Серле», «Сүзне тап», «Бизәлгән  чыршы», «Кар фантазияләре»,  «Бәйрәм капчыгы»дип аталган күңелле уен-конкурсларда бик теләп катнаштылар.
Балалар вакытны күңелле һәм кызыклы итеп үткәрделәр,уңай эмоцияләр һәм бүләкләр алдылар.

Кошлар - безнең дусларыбыз. Кыш көне аларга һәрвакытта да җиңел туры килми. Алар ярдәм итү йөзеннән 3 гыйнвар көнне Мингәр авыл клубында "Безнең канатлы дусларыбыз"дип исемләнгән чара үткәрелде. Балалар белән бергә кошлар өчен җимлекләр ясап, аларга азык салып клуб янындагы агачларга элдек. Ә хәзер инде көн саен җимлекләрне карап, кошларга бөртекләр салып торачакбыз.

Кыш җитү белән һәркемнең күңелендә бу ел фасылын күңелле һәм шатлыклы итеп үткәрү теләге туа. 4 январь көнне Кызыл-Мишә мәдәният йорты  һәм китапханә хезмәткәрләре балаларны саф һавада узган «Шатлык һәм көлке көртләрендә» дип исемләнгән уен программасында катнашырга чакырдылар. Кыш бабай  һәм Кар кызы белән бергә балалар хәрәкәтле уеннар уйнадылар, шулай ук рәхәтләнеп чанада шудылар. Бу чарада катнашучылар саф һавада уйнаган хәрәкәтле уеннардан һәм  аралашудан  бик күп уңай эмоцияләр алдылар.

Яңа ел - ул иң көтеп алынган һәм искиткеч бәйрәм. Аны тылсымлы, серле, гаҗәеп, кабатланмас, сокландыргыч дип атыйлар. Яңа ел төнендә без барлык теләкләрнең, чираттагы могҗизаның, якты әкиятнең, яңа бәхетнең чынга ашуын көтәбез. 30 декабрь көнне Кызыл-Мишә мәдәният йортында  «Могҗизалы Яңа ел» дип исемләнгән бәйрәм бал – маскарады булып узды. Мәдәният йорты сәхнәсендә   барысын да матур итеп бизәлгән Яңа ел чыршысы көтә иде. Мәдәният йорты һәм авыл китапханәсе хезмәткәрләре бәйрәм кичәсенә кызыклы һәм бай эчтәлекле театральләштерелгән программа әзерләделәр. Бәйрәмгә җыелган тамашачыларны Яңа ел белән Тимершык авыл җирлеге башлыгы Хаҗиев А.Х. котлады, аларга исәнлек-саулык, эшләрендә, гаилә тормышында, шәхси эшләрендә уңышлар теләде. Бәйрәм кичәсенә Кыш бабай белән Кар кызы килгәч, чын-чынлап күңел ачу башланды.   Кыш бабай белән Кар Кызы бик күп яңа ел бәйгеләре, күңелле уеннар үткәрделәр. Җиңүчеләрне призлар көтте. Кичә сюрпризлар һәм онытылмаслык биюләр белән тулы булды. Бәйрәмдә катнашучыларның барысы да күңелле музыка, әкият геройлары һәм чегәннәр чыгышы, Кыш Бабай һәм Кар кызы котлаулары аша  бер ел буена җитәрлек күңел күтәренкелеге һәм энергия алдылар. Яңа ел бәйрәме барысына  да әкияти тылсым, күңел ачу һәм шатлык хисләре бүләк итте. Барлык начарлыклар да узып баручы елда калсын, ә барлык яхшылыклар һәм  изгелекләр  Яңа  елга аяк бассын. Барыгызга да бәхет, уңышлар, мәхәббәт һәм теләкләрнең чынга ашуы!

Район күләмендә  1-5 сыйныфлар арасында үткәрелгән шахмат ярышында Тимершык урта мәктәбе укучылары 3 урынны яуладылар.

20 декабрь көнне Кызыл-Мишә мәдәният йортында автор-башкаручы Раил Гаязов үзенең  сольный концертын куйды. Концерт Раилнең сүзләренә язылган җырлары, шигырьләре белән үрелеп барды.
Концертта Раил үзенең нинди талант иясе икәнен генә күрсәтеп калмады, халыкны да җырлатты, сканвордлар чиштереп ял да иттерде. Концертта шулай  ук авылыбызның үзешчәннәре дә чыгыш ясады. Тамашачыга  концерт бик ошады!

2019 елның 6 декабрендә Тимершык урта мәктәбендә укучылар белән полиция майоры А.Г.Романова, полиция капитаны Р.В.Габдрахманов һәм А.Р.Исхакова “Яктылык кайтаручы элементлар”,” Спиртлы эчемлекләр , психотроп һәм наркотик мәтдаләр куллану, тәмәке тарту һ.б”. темаларына әңгәмә уздырдылар.  Алар шулай ук укучылар игътибарына 2010 елның 71 законын үтәү кирәклеге турында мәгълүмат җиткерде.