ЯҢАЛЫКЛАР

Шатлык ул зурмы, кечкенәме - мөһим түгел, ә менә кешеләргә аны бүләк итү үзеңнең дә күңелеңне сугара, яшәү офыгың киңәеп, яктырып киткәндәй була. 5 август көнне Кызыл- Мишә мәдәният йортында, Тимершык, Кызыл-Мишә, Сабай авылларының сәләтле яшьләре катнашында "Яшьлек тавышы" дигән концерт куелды. Концертта яшьләребез башкаруында халык яратып өлгергән эстрада җырлары яңгырады, төрле биюләр сәхнә күрке булды. Тамашачылар концерт программасында катнашучыларның барысын да алкышлар белән каршы алдылар. Матур һәм истә калырлык номерлар барыбызга да онытылмаслык хис-тойгылар бүләк итте. Тамашачыларның концертта яңгыраган җырларга кушылып җырлап утырулары, гөрләтеп кул чабулары яшьләребезгә дәрт өстәде.

«Мәктәпкә әзерләнергә ярдәм ит» акциясе кысаларында, "Татарстан Республикасы Саба муниципаль районы Тимершык урта гомуми белем бирү мәктәбе»  укучыларына букчалар һәм уку кирәк-яраклары тапшырылды. Әлеге акциядә катнашкан һәркемгә рәхмәт сүзләребезне җиткерәбез.

31 июль көнне Кызыл-Мишә мәдәният йорты мөдире балалар өчен Халыкара дуслык көненә багышланган «Сәламәтлек дуслары» дип исемләнгән спорт бәйрәме үткәрде. Спорт мәйданчыгы балаларның шат авазларыннан яңгырап торды. Балаларга ике командага бүлешергә һәм исем уйлап табарга тәкъдим ителде. Бу биремне алар «бик яхшы»га үтәделәр һәм җәйге исемнәрдән торган «Солнышко» һәм «Ветерок» командалары барлыкка килде. Бу командалар спорт эстафеталарында көч сынашты. Балалар көчләреннән килгәнчә тырыштылар. Һәркем үзенең командасының җиңүен теләде. Эстафета дәвамында командаларда көндәшлек рухы хакимлек итте. Балалар уен кагыйдәләрен игътибар белән тыңлауның ничек мөһим икәнлеген аңладылар. Һәр команда үз уенчылары өчен җан атты, исемнәрен кычкырып, куллар болгадылар. Ике команда да бике нвык тырышканлыктан, дуслык җиңде дигән карар кабул ителде. Балалар татлы бүләкләр алдылар, аларның канәгатьлектән елмайган йөзләрен күрү бик рәхәт булды

2021 елның 1 августыннан Тимершык авыл җирлеге территориясендә Бөтенроссия авыл хуҗалыгы санын алу башланды. 31 августка кадәр исәпкә алучылар чәчү мәйданнары һәм терлекләр саны буенча сораштырулар үткәрәчәк.

Соңгы елларда терлекләрне көтүлекләргә озату һәм каршы алу, капка төбендә кич утырулар кебек гореф-гадәтләр онытыла башлады. Яшьләр өчен бу ят булса да, өлкәннәр яхшы хәтерли: элек кич белән авыл кешеләре капка төпләренә утырырга җыелалар иде. Анда авылдагы соңгы яңалыклар, алда торган эшләр турында фикер алышалар, аннары күңел ачу чаралары башлана иде. Гармун астында җырлар, уеннар, биюләр кич утыруның дәвамы булып тора. Бу традицияләрне яңарту максатыннан, 23 июль көнне Кызыл-Мишә мәдәният йорты хезмәткәрләре һәм авыл халкы кунакчыл хуҗалар – Дилбәр һәм Фәиз Нигъмәтҗановларның чәчәкләргә күмелеп утырган йортлары янына кичке уенга җыелдылар. Барлык катнашучылар да гармун астында җырлар җырладылар, биеделәр, күңелле уеннар уйнадылар һәм конкурсларда катнаштылар. Моңарчы күрелмәгән яңа талантлар ачылды. Бәйрәмгә авыл халкы үзләре белән төрле камыр ризыклары һәм тәм-томнар алып килгәннәр иде. Бу җылы очрашуның ахыры дусларча чәй эчү белән тәмамланды.

Региональ дәрәҗәдәге юл кырыйларында җәяүлеләргә куркынычсызлык тудыру максатыннан хәрдаим яңа эшләр башкарылып тора. Тимершык авылында да заман таләпләренә туры китерелеп ООО «СПЕЦДОРСТРОЙ» оешмасы тарафыннан яңа тротуар җәю эшләре башкарыла.

22 июль көнне Кызыл-Мишә мәдәният йортында «Минем җәйге каникулларым» дип исемләнгән рәсем конкурсы үткәрелде. Конкурста мәктәп һәм мәктәпкәчә яшьтәге балалар катнашты. Чара башында авыл мәдәният йорты мөдире балалар белән җәйләрен ничек күрүләре турында фикер алышты. Балалар рәхәтләнеп җәйге кичерешләре белән уртаклаштылар. Үз рәсемнәрендә алар кояш, чәчәкләр, күбәләкләр, балалар ясадылар. Барлык рәсемнәр дә кызыклы булды. Чара «Простоквашинода каникуллар» дигән мультфильм карау белән тәмамланды.

16 июль көнне Кызыл-Мишә мәдәният йорты хезмәткәрләре китапханә белән берлектә балалар өчен "Табышмак әйтәм" дип исемләнгән табышмаклар кичәсе үткәрделәр. Чара башында балаларга табышмакларның төрләре һәм темалары, аларны ничек уйлап табарга мөмкин икәнлеге турында сөйләделәр. Аннан соң балалар «кием», «хайваннар», «табигать» темасына табышмакларга җавап бирделәр. Чарада катнашучылар вакытны кызыклы итеп үткәрделәр.

Җәйге чорның иң күңелле бәйрәмнәреннән берсе- балыкчылар көне. Шул уңайдан 13 июль көнне  Кызыл-Мишә мәдәният йорты һәм китапханә хезмәткәрләре балалар белән плотинага сәяхәт оештырдылар. Китапханәче балык тоту белән мавыгучы балаларны бәйрәм белән котлады һәм «Балыкчылар көне»нең 1980 нче елдан июль аеның икенче якшәмбесендә билгеләп үтелүе турында сөйләде. Башта балалар “Балык тот” ​ викторинасында катнаштылар, табышмаклар чиштеләр. Чара плотинада балык тоту белән дәвам итте. Барлык балыкчыларга да балык тоту бәхете тәтемәде. Иң тәҗрибәле һәм уңышлы балыкчы булып Заринә Шакирҗанова танылды. Балаларга әлеге сәяхәт бик ошады.

Тимершык авылының Габбас һәм Комсомол урамнарында Республика программасы нигезендә иске су үткәргечне яңага алыштыру эшләре алып барыла. Эшне ТР Саба муниципаль районының Шәмәрдән торак коммуналь хуҗалыгы оешмасы башкара.