ЯҢАЛЫКЛАР

19 июньдә Кызыл-Мишә мәдәният йортында, китапханә белән берлектә, яшьләр белән «Минем үз фикерем, үз карашым» дигән темага түгәрәк өстәл артында диспут узды. Сүз хәзерге җәмгыятьтә терроризм һәм экстремистлык күренешләренең актив таралуы, яшүсмерләр һәм яшьләр арасында төрле социаль күренешләрнең катастрофик үсеше, җинаятьчелек үсеше турында барды.

16 июнь көнне ​ Кызыл-Мишә мәдәният йорты һәм китапханә хезмәткәрләре, балалар белән  “Иң-иң татлы, затлы җимеш – тырыш хезмәт җимешедер” дигән ​ исем астында танып белү сәгате үткәрделәр. Кичәдә халык иҗаты өлгеләре аша эш сөючәнлек, тырышлык, әти-әниләр хезмәте, һөнәрчеләр турында сөйләшү алып барылды,​ уку – укучының төп эше икәне ассызыкланды. Балаларның сөйләмнәрен, зирәклекләрен, сәләтләрен үстерү, матур итеп эшләргә дә, ял да итә белергә өйрәтү максат итеп куелды. Кичәнең икенче яртысында​ балалар белән Кызыл-Мишәдәге роботлаштырылган комплекска экскурция ясадык. Авыл хуҗалыгы өлкәсендә төп җитештерү тармагы булган фермадагы эшләүчеләрнең эшчәнлеге белән таныштык.

13 июнь көнне Тимершык авылында традицион Сабантуй - 2021 булып узды. Бәйрәм балаларның туган телләр һәм Халык бердәмлеге елына багышланган хореографик чыгышы белән башланып китте. Котлаулардан соң бәйрәмнең спорт программасы башланды. Спорт ярышлары бик җанлы темпта үтте. Көн буе сәүдә ярминкәсе эшләде, күңелле музыка яңгырады. Бу көнне төрле ярышлар һәм уеннар үткәрелде. Авыл халкы, кунаклар уеннарда актив катнаштылар. Сабантуйның иң мөһим ярышы-милли көрәш. Сабантуйның абсолют батыры булып Җәләлиев Эдуард калды. Абсолют батырга традиция буенча тәкә бүләк ителде. Барлык җиңүчеләргә дә кыйммәтле бүләкләр тапшырылды. Бәйрәм якты, җылы һәм тыныч булды

Табигатьне саклау максатыннан Тимершык авыл җирлегендэ елга ярларын һәм сулыкларны чүп-чардан чистарту эшләре даими рәвештә алып барыла. Шул максаттан Мишә елгасы буендагы корган агачларны кисеп, чистарту эшләре башкарылды.

Безнең экологик иминлегебез – тормышыбызның иң мөһим өлешләреннән берсе. Ел саен 5 июньдә Бөтендөнья әйләнә-тирә мохитне саклау көне билгеләп үтелә. Әйләнә-тирә мохиткә кеше эшчәнлеге зур тискәре йогынты ясый, шуңа күрә үсеп килүче буын белән профилактик чаралар үткәрү бик мөһим. Туган як табигатенә мәхәббәт һәм сак караш тәрбияләү, шулай ук җәйге каникуллар вакытында мәктәп укучыларының актив ялын оештыру максатыннан Кызыл-Мишә мәдәният йорты һәм китапханә хезмәткәрләре 4 июнь көнне балалар белән җәйге табигатькә экскурсия оештырдылар. Мондый экскурсияләр балаларга экологик тәрбия бирүнең мөһим өлеше булып тора, балалар анда кошлар сайравын ишетү, үсемлекләрне өйрәнү, табигатебезнең матурлыгына соклану мөмкинлеге алалар. Үзләре белән алган тәм-томнардан авыз итеп алгач, балалар Тау астындагы чишмәләрнең, инешнең  тирә-юньнәрен чистартып, чишмәләрнең салкын суларыннан авыз иттеләр, табигать могҗизаларын күзәттеләр. Соңыннан җәйге табигать хозурында балалар рәхәтләнеп күңел ачтылар.

1 июнь көнне Кызыл-Мишә мәдәният йортында китапханәче белән берлектә 1 нче июнь – Халыкара балаларны яклау көне уңаеннан, балалар белән бәйрәм тамашасы оештырылды. Җәйге каникуллар башланып кына килгән чорда, бу очрашу укучыларның, балалар бакчасына йөрүче нәниләрнең күңелен ачу өчен менә дигән мөмкинлек булды. Күңелле  уеннар барышында, балаларның чырык-чырык көлүләрен ишетү, эстафета уеннары уйнаганда, аларның бердәмлеген, җитезлеген, хәрәкәтчәнлеген күрү – үзе ни тора! Мондый уеннарның спортка мәхәббәт уятуда да, балаларны телевизор, компьютер экраннарыннан аерып торуда да әһәмияте зур! Рәхәтләнеп күңел ачканнан соң, балаларга истәлекле бүләкләр тапшырылды һәм лотерея уены уйнатылды.

Тирә-якны төзекләндерү максатыннан Тимершык авыл җирлеге буенча иске йорт, каралты кура сутү эшләре даими үткәрелеп тора.

Тимершык авыл җирлегендә көндәлек тирә-якны төзекләндерү буенча максатчан эш алып барыла. Шул максаттан чыгып җәйге чорда җирлек территориясен җыештыру, печән чабу эшләре алып барыла.

Яшьләр арасында алкоголизмны кисәтү, алкогольнең организмга һәм кеше сәламәтлегенә ничек йогынты ясавы, алкоголь куллануга тискәре караш, сәламәт яшәү рәвешен пропагандалау максатыннан, 22 май көнне Кызыл-Мишә мәдәният йорты хезмәткәрләре һәм китапханәче яшьләр белән “Алкоголик сәламәт була аламы?” дип исемләнгән аралашу сәгате үткәрделәр. “Синең сәламәтлегең һәм алкоголь” дигән слайд-презентация кулланып, алар алкогольнең начар йогынтысын, шулай ук аның яшь организмга тискәре нәтиҗәләрен күрсәтергә тырыштылар. Мәдәният йорты мөдире яшьләр арасында алкоголь кулланудан зыян күрүне ачыклау максатыннан “Синең алкогольгә мөнәсәбәтең” дигән сораштыру-дискуссия үткәрде. Чараны оештыручылар һәм катнашучылар, аеклык –  тормыш нормасы дигән нәтиҗәгә килделәр. Физик культура, спорт, түгәрәкләр, китапханә һәм авыл мәдәният йортына йөрү, буш вакытны, кызыклы  ялны дөрес оештыру - болар барысы да начар гадәтләрнең үсешенә, һәм барыннан да элек, алкоголь куллануга каршы этәргеч була.

Тимершык авыл җирлегендә территорияне төзекләндерү буенча максатчан эш алып барыла. Кызыл -Мишә авылында "Татавтодор" ААҖ эшчеләре тарафыннан төбәк әһәмиятендәге юл ремонтлана.