ЯҢАЛЫКЛАР

     2021 елның 15 маенда Тимершык авыл җирлегендә Агач утырту буенча "Хәтер бакчасы" акциясе үткәрелде. Волонтерлар, җирлек халкы әлеге чарада актив катнаштылар.

Халыкара гаилә көнен бәйрәм итү кысаларында 14 май көнне Кызыл-Мишә мәдәният йортында китапханә белән берлектә "Гаилә, мәхәббәт һәм тугрылык көне" дип исемләнгән ял кичәсе үткәрелде. Анда Нигамәтҗановлар, Фәтхиевлар, Ганиевлар,  Гаттаровлар, Әүхәдиевлар гаиләләре катнашты. Өлкәннәр дә, балалар да конкурс программасында актив катнаштылар. Алар табышмакларга җавап бирделәр, гаилә, дуслык турында җырлар җырладылар, биеделәр, төрле биремнәр үтәделәр. Барлык катнашучылар да күтәренке, яхшы кәеф һәм уңай эмоцияләр алдылар.

Бөек Ватан сугышында җиңүнең 76 еллыгын бәйрәм иткән көннәрдә, Тимершык авыл җирлегендәге сугыштан кайтмый калган авылдашлар истәлегенә эшләнгән һәйкәлләр каршында бәйрәм митингы үткәрелде.   Укучылар, авыл халкы мәктәптән һәйкәлгә таба, “Үлемсез полк” акциясе кысаларында, бабаларының рәсемнәрен күтәреп хәрәкәт иттеләр.  Бәйрәм укучыларның Җиңү көне уңаеннан концерт номерлары белән үрелеп барды.  Бәйрәм митингы һәйкәлгә чәчәкләр кую һәм  Бөек Ватан сугышында катнашкан әби-бабаларыбызны бер минут тынлык белән искә алып тәмамланды.

28 нче апрель көнне Тимершык авылында яшәүче Нуруллина Өммегөлсем әби 90 яшьлек туган көнен билгеләп узды. Аны Тимершык авыл җирлеге башлыгы Хаҗиев А. Х. котлады һәм бүләкләр тапшырды. Алга таба да кәдер, хөрмәттә яшәвен телибез.

Беренче Май – бөтендөнья хезмәт ияләре бәйрәме. Күпләр аны балачактан ук хәтерли һәм ярата. Язның соңгы аена туры килүгә карамастан, нәкъ менә ул җылылык һәм кояш яктысы башлану символы булып санала. Ә россиялеләр өчен ул май каникулларының башлануын аңлата. Ул алар өчен эш ыгы-зыгысыннан арынып, туганнары һәм дуслары белән ял итүгә багышланган көннәр. 1 май көнне Кызыл-Мишә мәдәният йортында 1 Май –  Яз бәйрәменә багышланган "Урамнарда бүген яз бәйрәме" дип исемләнгән бәйрәм концерты булды. Авыл мәдәният йорты һәм китапханә хезмәткәрләре тарафыннан, кунаклар һәм авыл халкы өчен бик матур җырлы программа әзерләнгән иде. Концертта яшьләрнең генә түгел, СССРда  туганнарның да яраткан җырлары, инде тамашачылар яратып өлгергән үзешчән артистларның башкаруында яңгырады. Артистларга кушылып,  тамашачылар да үзләренә яхшы таныш булган җырларны  башкардылар. Башкаручыларның осталыгы, тамашачыларның көчле алкышлары концертны чын бәйрәмгә әверелдерде һәм бар кешедә уңай эмоцияләр тудырды.

Саба районының Тимершык  авыл җирлегендә сугыш ветераннарының тол хатыннарын якынлашып килүче  Җиңү Көне белән котладылар. Аларга Татарстан Республикасы  Президенты  исеменнән котлау открыткалары һәм бүләкләр тапшырылды.

Тимершык авыл җирлегендә зиратларны чистарту буенча өмәләр дәвам итә. Халык актив катнаша.

Тимершык авыл җирлегендә авыл урамнарын грейдер белән тигезләү эшләре алып барылды.

24 апрель көнне санитар-экологик икеайлык кысаларында Тимершык авыл җирлегендәге оешма-предприятиеләрдә, шәхси хуҗалыкларда, урамнарда, зиратларда тирә-якны чүпләрдән чистарту максатыннан өмәләр оештырылды. Җыештыру эшләрендә җирлек халкы зур теләк белдереп актив катнашты.

21 апрель көнне Кызыл-Мишә мәдәният йортында Саба интернат-мәктәбенең мөмкинлекләре чикләнгән балалары арасында спорт ярышлары булып узды. Алар ике командага бүленделәр. Спорт дәрте һәм үз командасы өчен җиңүгә ирешү теләге команданың барлык әгъзаларын шулкадәр җәлеп итте ки, алар тирә-юньдәгеләрне сизмәделәр дә. Кызлар һәм малайлар конкурсларда бик теләп катнаштылар, шәхси һәм командада булган  җиңүләренә куандылар, үзләренең җитезлекләрен, зирәклекләрен, тизлекләрен күрсәтә алдылар. Барысы да финишка беренче булып килергә тырыштылар. Алар барысы да бәхетле иде. Ә балаларның бәхеттән балкыган  күзләрен күрү – бәйрәмне оештыручыларга иң яхшы бүләк булды. Бу чарадан балалар бик күп уңай эмоцияләр, зур дәрт һәм энергия алдылар, чын күңелдән күңел ачтылар. Командалар бер үк санда балл җыйды. Биредә җиңелүчеләр булмады – дуслык җиңде!