ЯҢАЛЫКЛАР

Тимершык авыл җирлегенә кергән  Көек авылында, Бөек җиңүнең 75-еллыгы уңаеннан, 9 Май көнне, Бөек Ватан сугышында катнашкан авылдашлар истәлегенә стела ачылды. Һәйкәл Татарстан Республикасы Дәүләт Советы депутаты Галиев Марат Ибраһим улы иганәчелегендә төзелде.  Ачылу тантанасында Саба муниципаль районы башлыгы Минниханов Раис Нургали улы, Галиев Марат Ибраһим улы һәм җирле җитәкчеләр катнашты. Көек авылы халкы исеменнән эшне оештыручыларга һәм  стеланы төзүчеләргә рәхмәт белдерәбез.

Үзизоляцияләү режимында бер кешегә дә җиңел түгел. Шул уңайдан, "Ярдәм янәшә! Помощь рядом!" республика хәрәкәте, "Магнит" компаниясе белән берлектә, дүрт бала тәрбияләүче гаиләләргә ярдәм йөзеннән хәйрия акциясе оештырды. Бу акция кысаларында Тимершык авыл җирлегеннән 4 гаиләгә азык-төлек җыелмасы тапшырылды.

Татарстан Республикасы президенты инициативасы белән, үзизоляция чорында,  «Ярдәм янәшә!” акциясе оештырылып, аерым категория гражданнарга азык-төлек җыелмалары таратылды. Бу җыелмаларга Тимершык авыл җирлегеннән 26 гаилә ия булды.

Экологик ике айлыгы кысаларында Тимершык авыл җирлеге территориясендә агачлар утырту эшләре алып барыла. Җиңүнең 75 - еллыгы уңаеннан Миңгәр авылында Бөек Ватан сугышы ветераннары истәлегенә куелган обелиск янына да нарат агачлары утыртылды. Бу эшләр алга таба да дәвам итәчәк.

Саба районы авыл җирлекләрендә  яшь белгечләрне тораклы итү һәм авыл җиренә  квалификацияле белгечәр тарту максатыннан Республика күләмендә “Яшь белгечләргә аренда торагы” программасы тормышка ашырыла.Программа кысаларында Тимершык авыл җирлегендә дә  йортлар төзелеше дәвам итә. Чираттагы йорт Көек авылында, авыл хуҗалыгы белгече өчен төзелә.

Татарстан Республикасы Саба муниципаль районы Кызыл-Мишә авылында Мишә елгасы аша яңа күпер салу эше дәвам итә. Күперне “ Базовый проект” ҖЧҖ  оешмасы эшли.

18 апрельдә Халыкара һәйкәлләр һәм тарихи урыннар көне (Бөтендөнья мирас көне) билгеләп үтелә.

Тимершык авыл җирлегендә мондый объектларны һәрдаим контрольдә тотабыз һәм төзекләндерәбез.

Яз җитеп җир йөзе кардан арыну белән табигатьтә корылык башлана. Бу чорда бигрәктә коры үлән һәм урман-полосаларны янгыннан сакларга кирәк. 10 нчы апрельдән 17 майга хәтле кертелгән янгынга каршы режим шартларында деподагы янгын сүндерү машиналарының төзеклекләрен  һәрдаим контрольдә тотабыз.

Җәмгыятьтә үзизоляция шартларында күпбалалы һәм мохтаҗ гаиләләргә ярдәм итүнең мөһимлеге артты. Татарстан Республикасының Дәүләт Советы депутаты Галиев Марат Ибрагим улы шундый кешеләргә азык-төлек пакетлары белән булышлык күрсәтте. Аңа зур рәхмәт белдерәбез.

Тимершык авыл җирлегендә авыл урамнарын грейдер белән тигезләү эшләре алып барылды.