ЯҢАЛЫКЛАР

Эзмә авыл жирлегенен Иләбәр авыл китапханәсе һәм клуб хезмәткәрләре “Ак калфак” клуб берләшмәсе членнары белән берлектә “Очрашулар кирәк һәрвакыт” дигән исем астында бәйрәм кичәсе оештырдылар. Чараның беренче өлешендә “Гәҗит - журналларны бергәләп укыйбыз” дип исемләнгән мәгълүмат сәгате уздырылды. Катнашучылар китапханәгә килүче вакытлы матбугат битләрендә басылган кызыклы язмалар белән таныштылар. Чараның икенче өлешендә фольклор уеннар оештырылды. Өлкәннәребез уеннарда бик теләп катнаштылар, чара чәй табыны артында дәвам итте.

Эзмә авыл жирлегенең мәдәният йорты, авыл клубы хезмәткәрләре китапханә белән берлектә «Кабак бәйрәме-2021» бәйрәмендә катнаштылар. Чара Байлар Сабасында «Ямьле Саба» паркында узды. Бәйрәмгә кабактан кызыклы эшләнмәләр ясалды, көзге уңыштан төрле тәм-томнар әзерләнде.

Эзмә авыл жирлегендә «Россия суы» акциясе барышында су саклагыч урыннарны чистарту буенча өмә булып узды.

«10» сентябрь көнне «Татарча диктант Яз» бөтендөнья акциясе узды. Әлеге акциягә Эзмә авыл җирлегенен Иләбәр авыл китапханәсе һәм клуб хезмәткәрләре, китапханәгә йөрүче китап укучылар да кушылды. Язучы Г.Бәшировның «Чишмә моңы ничек җыр булды» дигән  әсәреннән өзекне диктант рәвешендә язып, һәркем үзенең белемен сынап карады. Диктант китапханәче тарафыннан әйтелеп яздырылды.

Матурлыкны үлчәп булмый, аның белән сокланырга гына була. Халыкара матурлык көне-дөньяны, чыннан да, коткарып кала! Нәкъ менә 9 сентябрьдә үзләренең һөнәри бәйрәмнәрен безнең тышкы кыяфәтебез хакына эшләүче хезмәт күрсәтү өлкәсенең күп кенә кешеләре билгеләп үтә. Алар-чәчтарашлар һәм стилистлар, визажистлар һәм массажистлар, пластик хирурглар һәм тырнак ясау сервисы хезмәткәрләре, фитнес тренерлары һәм кеше тәненең дизайнерлары – алар барысы да матурлык көне белән котлаулар кабул итәләр. Матур булу - барлык кызларның хыялы. Шул максат белән Эзмә мәдәният йорты хезмәткәрләре Эзмә авылы кызлары белән матурлык салоннарының берсенә экскурсия оештырдылар. Визитның максаты-матур образлар тудыручы осталарның эше турында күбрәк белү һәм танышу. Кызлар матур прическалар тудыруларын һәм тырнак ясау остазының эшен ничек башкаруларын зур гаҗәпләнү белән күзәттеләр. Матурлык кеше өчен һәрвакыт мөһим урында тора.

Эзмә авыл җирлегенең Эзмә авылында яна пожар гидранты урнаштырыла. Эшне Саба районы торак-коммуналь хуҗалыгының Шәмәрдән күптармаклы җитештерү предприятиесе башкара.

«08» сентябрь көнне  Эзмә авыл җирлегендә халык җыены булып узды. Җыенда Саба муниципаль районы Башлыгы Р.Н. Минниханов катнашты. Эзмә авыл җирлеге башлыгы  Шайхетдинов А.Р. халык каршында 2016-2021 нче елларда авыл җирлегендә башкарылган эшләр буенча чыгыш ясады һәм 2021-2026 нчы елларда эшләнергә тиешле эшләргә тукталып, бурычларны да билгеләп үтте. Җыенны йомгаклап Саба муниципаль районы Башлыгы Р.Н. Минниханов, авыл җирлегендә яшәүче халыкка мөрәҗәгать итеп, авылның һәм гомүмән районның киләчәген ничек күрүе, нинди юнәлештә хәрәкәт итәргә кирәклеге турындагы фикерләре белән уртаклашты.

Иләбәр авыл китапханәсенә килүче вакытлы матбугат чаралары  арасында балалар өчен журналлар зур урын алып тора. 8 сентябрь көнне  китапханәдә “Умырзая”  балалар бакчасына йөрүче балалар өчен “Балаларга – журналлар” дигән исем астында библиографик дәрес уздырылды. Балалар рус һәм татар телендә басылган  журналлар белән таныштылар. Кызыклы башваткычлар, ребусларны чишү юлларын өйрәнделәр, табышмакларга җавап эзләделәр,рәсемнәрне буядылар. “Салават күпере” журналында урын алган махсус QR-кодны кулланып җырлар,әкиятләр  тыңладылар.

1 нче сентябрь көнне Мәктәпләрдә hәр бала көтеп алган яңа уку елы башланды. Куңелләрдә сөенеч, йөзләрдә шатлыклы елмаю балкый. Яңа уку елы hәркемгә шатлык-сөенечләр,бары тик яхшы билгеләр, уңышлар гына алып килсен.

Республика көне – күпмилләтле Татарстан халкының тынычлык һәм иминлек, бердәмлек символы бәйрәме. 31  август көнне Эзмә авыл жирлегенен Иләбәр авыл китапханәсе һәм клуб хезмәткәрләре әлеге  бәйрәм уңаеннан  “ Татарстан - Республикам ”  дигән исем астында бәйрәм чарасы уздырдылар. Республиканың символлары белән танышып, тематик күргәзмәгә обзор ясалды.  Катнашучылар белән  “Тарихыңны беләсеңме” дигән исем астында блиц викторина узды.  Чараның икенче өлешендә  “Бәхетеңне сына” дигән уен-лотереядә катнаштып истәлекле бүләкләр оттылар, чара хәрәкәтле уеннар белән тәмамланды.