ЯҢАЛЫКЛАР

19 июль көнне Олыяз"Чәчкә" балалар бакчасында иң көтеп алынган һәм иң юеш бәйрәм - Нептун көне үткәрелде. Балалар әкияти герой, диңгез һәм океаннар патшасы Нептун һәм аның кызы Русалка белән танышуга бик шатландылар Бергәләп табышмакларга җавап бирделәр, күңелле эстафеталарда катнаштылар. Балалар кыюлык, җитезлек һәм нәтиҗәгә ирешүдә үҗәтлекләрен күрсәттеләр. Барлык уеннар да балаларның яшь үзенчәлекләрен исәпкә алып сайланылды.

Әлеге чарада  су беллән бик күп төрле уеннар һәм эстафеталар үткәрелде, диңгездә яшәүчеләр турында табышмаклар әйтелде. Бәйрәм ахырында сабын куыкларыннан «салют» булды.

Саба 5 нче номерлы «Бәләкәч» балалар бакчасында диңгез һәм океаннарда яшәүчеләргә багышланган тематик атна тәмамланды. Атна кысаларында тәрбияләнүчеләр су асты патшалыгы һәм анда яшәүчеләр турында күп яңалык белделәр, су белән тәҗрибәләр үткәрделәр, Нептун көнендә катнаштылар.

Безнең Олы Шыңар “Әллүки” балалар бакчасы “Балаһөнәр” проектында катнаша. 12 нче июль көнне балалар шушы проект нигезендә Саба гимназиясендә (“Научный институт”) һәм Сабаның МЧС та( “Спаситель») булып кайттылыр. Гимназиядә ОБЖ укытучысы  Хайриев И.З. балаларга  ничек итеп противогаз, газдан саклану киеме киюне, автомат җыюны күрсәтте. Солдатка кирәкле көрәк, су фляшкасы, котелок, каска һ.б. белән бик кызыклы, мавыктыргыч итеп таныштырды.

Сабаның МЧС хезмәткәрләре балаларны бик ачык йөз белән каршыладылар. Янгын куркынычсызлыгы буенча кызыклы мультфильм, информацион слайдлар күрсәттеләр. Аңлату эше уен формасында оештырылган иде. Диспечерга  песине коткарырга кирәклеге, Белмәмешнең ут белән уйнап янгын чыгарганлыгы һәм аны сүндерергә кирәклеге турында хәбәр килде. Балалар бик теләп бу эштә катнаштылар, песине коткардылар, утны үзләре шлангадан су сибеп сүндерделәр. Янгын сүндерүченең каскасын киделәр, киемнәрен күрделәр һәм хәтта янгын сүндерү машинасына да утырып карадылар.

Бу көн балалар өчен бик файдалы булып үтте.

Кадерле чыгарылыш сыйныф укучылары, сезне тугызынчы сыйныфны тәмамлавыгыз белән котлыйбыз. Бүген сез олы тормышка аяк басасыз. Без ышанабыз, сез бу тормышта  яхшы уңышларга ирешәчәксез. Һәрвакыт дөрес карарлар кабул итегез. Нинди генә кыенлык килеп чыкса да сезне  сындырмасын һәм беркайчан да алга барудан туктатмасын. Янәшәгездә һәрчак авыр вакытта ярдәм итәргә әзер булган ышанычлы кешеләр һәм дуслар булсын иде.

11-16 нчы июль көннәрендә Алексеевск районының Биләр җирендә hөнәри үсешне нәтиҗәле итүче социаль күнекмәләрне үстерүгә багышланган өченче форум үз эшен башлады. "Сәләт-Саба" аланы сәләтлеләре әлеге форумда 6 көн буена бүтән аланнар белән ярышларда көч сынашачак. Балаларга уңышлар телибез.

8 июль көнне Рәсәйдә  гаилә, мәхәббәт һәм тугрылык көне. Хәрберебез гаиләсе белән горурлана, аны саклый һәм яклый. Үзебездә тәрбияләнүче  балаларыбызда без гаиләгә мәхәббәт, олыларга хөрмәт тәрбияләргә тырышабыз. Шундый максат белән Шәмәрдән 2 нче номерлы “Теремок” балалар бакчасы тәрбиячесе Закирова Наилә Мөнавир кызы уртанчылар төркеме балалары һәм ата-аналары белән “Бергә күңелле!” дигән исем астында күңел ачу чарасы үткәрде. Башта балалар гаилә турында шигырьләр сөйләделәр, әти –әниләре аларгы ничек яратып эндәшкәне, туганнарын ничек яратулары турында әйтеп киттеләр. Соңыннан “Су сибәбез”, “Зур кер юу”, “Уңыш җыю”, “Кем тизрәк”, “Себерке” шаян уеннары уйнап күңел күтәрделәр. Бергәләп күңел ачу балаларны һәм ата-аналарны якынайтты, гаиләләрне ныгытты.

 Һәр тугызынчы сыйныф укучысы тормышында онытылмаслык, дулкынландыргыч мизгел — төп гомуми белем турында беренче документны тапшыру. Балачагы, мәктәп шаярулары, шау — шулы үзгәрешләр артта калды, ә алда сайлау-10 сыйныф яки һөнәри белем.
     7 июль көнне районыбыз мәктәпләрендә төп гомуми белем бирү аттестатларын тапшыру тантаналары узды. Барлык чыгарылыш сыйныф укучыларын  аттестат алу белән котлыйбыз, яңа уңышларга ирешүләрен телибез. Хәерле юллар, чыгарылыш сыйныф укучылары. Сезнең теләкләрегез, планнар һәм хыялларыгыз чынга ашсын!

Су - җирдә уникаль яшәү чыганагы. Кешеләр һәрвакыт елга, сулыклар, диңгез ярларына, бигрәк тә җәйге чорда омтылганнар. Безнең 4 нче номерлы “Кынгырау” балалар бакчасында балаларны суга сак караш тәрбияләүгә аерым игътибар бирелә. 27 июльдә Балыкчы көнен билгеләп үттелде. Тәрбиячеләр балаларны төче сулыкларда яшәүчеләр һәм су асты дөньясы белән таныштырдылар. Атна дәвамында 27 июньнән 1 июльгә кадәр су белән тәҗрибәләр үткәрделәр, алар барышында балалар суның тәмсез, иссез һәм төссез булуын белделәр. «Сабинка» яр буе чишмәләренә экскурсияләр безнең тәрбияләнүчеләрдә онытылмас тәэсирләр һәм уңай эмоцияләр тудырды. «Су – яшәү чыганагы» дигән күңел ачу чарасы үткәрелде. Балалар табышмакларга җавап бирделәр, су турында мәкальләр искә төшерделәр, пазллар җыйдылар, балыкларның һәм сулыкларның башка яшәүчеләренең исемнәрен әйттеләр. Чара сабын куыклары тамашасы белән тәмамланды.

2022 елның 29 июненнән «Кояшкай» сәламәтләндерү лагере 2 нче смена балалары өчен үз ишекләрен ачты. Сменада 7-11 сыйныфларда укучы 85 бала ял итәчәк.

Сменаның максаты: талантлы балаларны заманча милли мәдәният, заманча биюләр, музыка, театр, сәнгать, спорт һәм журналистика юнәлешләре белән таныштыру, үз юнәлешеңне эзләү өчен уңайлы шартлар тудыру һәм балаларны сайлап алынган юнәлешләрдә күрсәтергә өйрәтү.

Смена профиле кысаларында түбәндәге дәресләр һәм мастер-класслар үткәрелә:

 - ачык һавада театр;

- вокал;

- дизайн;

- заманча хореография;

- журналистика нигезләре;

- фотосурәтләр эшкәрту;

 - шигырьләр/җырлар язу.

Кызыклы уку-укыту программасыннан тыш, балалар өчен шәхес формалаштыруга юнәлтелгән иҗади, спорт, фәнни-интеллектуаль чаралар да тормышка ашырылачак.

Саба 3 нче номерлы «Шоколад» балалар бакчасында чәчәкләр көне үткәрелде. Балалар бакчасында бу көн чәчәкләргә багышланган иде. Тәрбияләнүчеләр педагоглар белән бергә чәчәкләр турында шигырьләр һәм әкиятләр тыңладылар, табышмаклар чиштеләр, иллюстрацияләр, открыткалар, чәчәкләр турында китаплар карадылар, кәгазьдән чәчәкләр кистеләр һәм аларны буяулар, карандашлар белән буядылар. Шулай ук клумбаларга су сиптеләр, чүп үләннәрен җыештырдылар һәм могҗизалы чәчәкләр белән сокландылар. Педагоглар балаларга чәчәкләрнең күптөрлелеге турында сөйләделәр, тәрбияләнүчеләр таныш чәчәк исемнәрен кабатладылар, чәчәк үсемлекләренең дару да булуын белделәр. Табигать могҗизасын сакларга һәм бар кеше дә матурлыкка соклана алсын өчен, чәчәкләрне өзмәскә кирәк дигән карарга килделәр.