ЯҢАЛЫКЛАР

Саба урман хуҗалыгы тарихы музеенда балалар өчен «Сөйлә, курыкма!» дип исемләнгән мәгълүмат сәгате үткәрелде. Тормышта кыенлыклар һәм сораулар күп. Һәр кеше үзенә ярдәм кирәк булган вәзгыятькә эләгергә мөмкин. Бу моментта ишетелү мөһим! Ышаныч телефоны-ул дуслар һәм якыннар белән мөнәсәбәтләр, мәктәп һәм гаилә мөнәсәбәтләре турында фикер алышу өчен аноним рәвештә, бушлай һәм конфиденциаль рәвештә мөрәҗәгать итәргә мөмкин булган хезмәт. РФнең теләсә кайсы торак пунктында стационар һәм кәрәзле телефоннардан шалтырату вакытында балалар һәм аларның ата-аналары ашыгыч психологик ярдәм алырга мөмкин, аны гамәлдәге төбәк хезмәтләре белгечләре күрсәтә.

31 нче майда Шәмәрдән филиалы Х. һәм А. Вәлиуллиннар исемендәге Саба  балалар сәнгать мәктәбенең тынлы кораллар  бүлегендә укучы  балалар А. А. Фатхуллин җитәкчелегендә Мәскәүнең Колонный залында XXXI Халыкара «Союз талантов России» фестиваль-конкурсында катнашты. Конкурста Россиянең төрле төбәкләреннән һәм Беларусстан 2500 дән артык балалар катнашты. Безнең оркестр Татарстан Республикасын патриотик «Дефиле марш» номеры белән инструменталь башкару номинациясендә тәкъдим итте. Чыгышыбыз танылган артистлар, музыкантлар һәм хореографлардан торган жюри тарафыннан югары бәяләнде. Нәтиҗәдә без 1 дәрәҗә лауреат исеме белән бүләкләндек, бу зур горурлык һәм әһәмиятле җиңү булды.

Балаларны яклау көне - якты, шатлыклы бәйрәм. 1 июнь белән җәй башлана, бу көн хаклы рәвештә безнең балаларныкы. Балаларда безнең шатлык һәм өметебез, хезмәтебез һәм бәхетебез.

Олы Нырты авыл мәдәният йорты, китапханәсе, Чабья Чурчи авыл клубы хезмәткәрләре Халыкара балаларны яклау көне уңаеннан балалар Сабантуе үткәрделәр. Мәктәпкәчә яшьтәге балалар һәм башлангыч сыйныф укучылары «Кашыкта йомырка белән йөгерү», «Өч аяклы», «Аркан тартышу», «Таяк тартышу», «Капчык киеп йөгерү" һәм башка бәйгеләрдә осталык, тапкырлык һәм җитезлектә ярыштылар. Бәйрәм ахырында балалар тәм-том белән сыйланды.

1 июнь көнне Байлар Сабасының үзәк мәйданында балаларны яклау көненә багышланган «Бәхетле балачак» бәйрәм концерты узды. Мәдәният бүлеге җитәкчесе Заһидуллин Р.Ф. төрле конкурсларда катнашып,  Гран-при откан  җиңүчеләрне котлады һәм акчалата премиягә сертификат тапшырды. Шулай ук, «Талантлы балачак» конкурсына йомгак ясалды. Җиңүчеләр дипломнар һәм кыйммәтле бүләкләр алды, бу алар өчен күңелле сюрприз булды.

Сәхнәдә балалар сәнгать мәктәбе укучылары, шулай ук конкурста җиңүчеләр башкарган җырлар, көйләр яңгырады, биюләр башкарылды. Балаларның чыгышлары энергия һәм бай хис -кичерешләр белән тулы иде, ә дәртле биюләр бәйрәм атмосферасына аерым бер ямь өстәде. Бу көн балалар һәм аларның ата-аналары өчен чын бәйрәмгә әверелде.

30 майда Балалар сәнгать мәктәбенең актлар залында күңелле һәм онытылмаслык вакыйга - чыгарылыш кичәсе булды, ул чын мәгънәсендә музыка һәм талантлар бәйрәменә әверелде. 44 талантлы укучы сәнгать мәктәбен тәмамлау турында беренче таныклыкларын алды.

Балалар сәнгать мәктәбе директоры Газизов А.З. уку елларында һәр укучының талантын үстерүгә үзләренең белемнәрен, тәҗрибәләрен һәм күңелләрен салган укытучыларга рәхмәт сүзләрен җиткерде. Аерым рәхмәт сүзләре чыгарылыш сыйныф укучыларының әти - әниләренә җиткерелде. Мәдәният бүлеге җитәкчесе Заһидуллин Р.Ф. кичәнең тантаналы өлешен таныклыклар тапшыру белән ачып җибәрде. Мәктәпне тәмамлаучыларның әти-әниләреннән җавап сүзе мәктәптә уңай һәм иҗади атмосфера тудырган, балаларыбыз үсешенә бәяләп бетергесез өлеш керткән өчен бөтен коллективка юлланды.

28  май көнне Саба үзәк китапханәсендә күренекле татар галиме, китап белгече, библиограф, филология фәннәре докторы, Татарстан Фәннәр академиясенең хакыйкый әгъзасы, ТАССРның атказанган фән эшлеклесе, Татарстан Республикасының Габдулла Тукай исемендәге Дәүләт бүләге лауреаты, Кол Гали исемендәге халыкара бүләк лауреаты академик Әбрар Гыйбадулла улы Кәримуллинның тууына 100 ел тулу уңаеннан Республикакүләм "Без тарихта эзлебез..." иҗади-эзләнү конференциясе үтте.

Әлеге чарада Әбрар ага Кәримуллинны, безнең Саба якларын хөрмәт итеп мөхтәрәм  кунакларыбыз -  Рабит Батулла,  Марсель Галиев,  Фоат Галимуллин,  Газинур Морат,  Рамил Мирзаһитов,  Ирек Һадиев, Дания Нәгыйм, Айсылу Мансурова,  Гөләйрәм Зимагорова,  Илмира Гыймаева, Сөембикә Кашапова, Рәсимә Галиевалар да килде.  Алар китап укучылар белән очраштылар, иҗади - эзләнү эшләренә бәя бирделәр, Әбрар Кәримуллин турындагы матур истәлекләре белән уртаклаштылар.  Кунаклар иң элек Әбрар Кәримуллин исемен йөртүче китапханә, аның эшчәнлеге, Тукай паркы белән таныштылар. Әбрар Кәримуллинның балачагы, яшьлек еллары буенча әзерләнгән әдәби чара күренекле якташыбызның ятимлектә үткән сабый вакытын, Бөек Ватан сугышында күрсәткән батырлыкларын, туган ягына булган хисләрен  аңларга ярдәм итте,  

Саба муниципаль районы башлыгы урынбасары Закирҗанов Расих Рәхимҗан улы район башлыгы исеменнән котлауларын җиткерде, конференциядә катнашучыларга уңышлар теләде.

Конференциядә катнашучылар ике юнәлештә чыгыш ясадылар. “Батырлар бит үлми, мәңге яши, Иле, теле, халкы барында” юнәлешендә Бөек Ватан сугышында катнашкан танылган ир-ат якташларыбыз батырлыгы турында сөйләнде. Балык бистәсе,  Арча, Балтач, Зәй районнарыннан катнашучылар да бар иде.

Икенче юнәлеш "Милләтемнең югалмас хәзинәсе”. Китапханәләр тарихы, халык күңелендә тирән эз калдырган китапханәчеләрнең тормышы һәм эшчәнлеге яктыртылды.  Әлеге юнәлештә 11 эш каралды.

Чыгышларга нәтиҗә ясап,  җюри җиңүчеләргә  диплом, акчалата бүләк тапшырды. "Тарихың зур, барыр юлың ерак, галиҗәнап Татар китабы" дип исемләнгән түгәрәк өстәл артында сөйләшү барыбыз өчен дә кызыклы һәм файдалы узды. Язучылар, китапханәчеләр бергәләп китапны укучыларга җиткерү юллары турында фикер алыштылар.

Нинди генә дәрәҗәләргә, биеклекләргә ирешсә дә, Әбрар Кәримуллин һәрвакыт Сабаныкы булып калды, туган җирен яратып, сагынып яшәде. Ул васыяте буенча туган авылы Чәбия -Чүрчидә җирләнде. Кунаклар Әбрар Кәримуллинның каберенә чәчәкләр салдылар, аның исемен мәңгеләштерү буенча Сабада зур эш алып барылуын билгеләп үттеләр, районыбыз җитәкчелегенә рәхмәт хисләрен җиткерделәр.

Килгән кунаклар танылган якташыбызның туган авылы Чәби Чүрчи авылында Сабантуена бирнә җыю йоласында катнаштылар. Авыл халкы белән бергәләп, җигүле атларга утырып,  бирнә җыйдылар, Әбрар Кәримуллин турындагы иң җылы истәлекләрне кадерләп саклаучы авылдашлары белән аралаштылар.

Конференцияне оештыруда уздыруда зур ярдәм күрсәткән барлык мәдәният хезмәткәрләренә - Рафаель Шамсутдинов, Альберт Гузялов, Алмаз Газизов,  Айсылу Зарипова, Рәнис Мухаметзянов , Алмаз Батырханов, Илнур Муллахметов, Эльвира Галиева, Гүзәл Газизова, Рамил Шигабиев, Гөлназ Гаффарова, Локманов, Олы Нырты мәдәният йорты, Олы Арташ, Язлы Арташ, Урта Нырты авыл клубы хезмәткәрләренә һәм барлык китапханәчеләргә олы рәхмәтебезне җиткерәбез.

Традиция буенча 27 майда Россиядә белем саклаучыларның һөнәри бәйрәме — Гомумроссия китапханәләр көне билгеләп үтелә. Бу дата китапханәләрнең мәдәният, мәгариф һәм тарихи мирасны саклау үзәкләре буларак әһәмиятен искә төшерә. Китапханә-уникаль учреждение. Ул балаларны үстерергә, күңелләрне дәваларга, профессионализмны күтәрергә, интеллектны үстерергә, дөньяга карашны киңәйтергә, рухи яктан баерга ярдәм итә. Китапханә яшь буенча да, социаль яктан да чикләүләрне белми, аңа барысы да ихтыяҗлы – уйлый башлаган баладан алып тирән картка кадәр, ул барысына да аңлаешлы – академиктан алып укучыга кадәр. Бу көнне Шәмәрдән авыл һәм балалар китапханәсендә «Дуслык» клубының хатын-кызлар өчен «Тормыш китап белән янәшә» дигән кичә үткәрелде. Чара барышында китапханәчеләр Гатиятова Надия Ринат кызын һәм Дмитриева Елена Александр кызын һөнәри бәйрәмнәре белән котладылар. Бик күп матур сүзләр әйтелде. Чара бәйрәм өстәле артында китапханәчеләр турында шаяртулар, фактлар, шигырьләр белән үрелеп барды.

Танылган татар галиме, китап белгече-библиограф, филология фәннәре докторы, ТАССРның атказанган фән эшлеклесе, Габдулла Тукай исемендәге Дәүләт премиясе лауреаты Әбрар Гыйбадулла улы Кәримуллинның туган көне уңаеннан, Саба туган якны өйрәнү музее хезмәткәрләре тарафыннан «Туган якны өйрәнүчеләр» клубына йөрүчеләрне ул җирләнгән зиратка алып бару оештырылды. Якташыбызның кабер ташы янында академикның тормыш юлы һәм иҗаты турында сөйләнелде. Аннан соң, галимнең балачакта уйнап үскән туган йорты янында да әңгәмә корылды. Язучының иҗатына килгәндә, Ә. Кәримуллинның фәнни һәм публицистик хезмәтләре исемлеге 700гә якын. Ул үз эшчәнлегендә академик тикшеренүләр кысалары белән генә чикләнми. Ул республиканың иҗтимагый-сәяси тормышында бик актив катнашты. Аның республика газета-журналлары битләрендәге эчтәлекле мәкаләләре, радиода, ТВда, студентлар, галимнәр, хезмәт ияләре алдында татар язуы графикасы проблемалары, Татар китабы язмышы, татар теле, Мәдәни мирас мәсьәләләре турында чыгышлары бихисап. Аның публицистик мирасы бүген дә актуальлеген югалтмаган.

Саба урман хуҗалыгы тарихы музеенда мобилизацияләнгән якташларыбызның  балалары  өчен «Минем иҗатым» дип аталган мастер-класс узды. Чара башында музей хезмәткәрләре иҗат процессында кирәк булачак материаллар һәм кирәкле инструментлар турында сөйләделәр. Һәр катнашучы әзерлисе эйбернең тематикасын үзе сайлады. Моның белән без балаларга чикләүләрсез фантазияләргә мөмкинлек бирдек. Һәм һәр бала үз хыялын тормышка ашыра алды.

2025 елның 20 маенда Яр Чаллы шәһәренең "Энергетик" мәдәният сараенда композитор Ринат Гобәйдуллинга багышланган "Сердәш" татар сәнгате конкурсының гала - концерты булды. Бу концертка матур номер белән сайлап алу этабын узгач "Милләтем-татар минем" номеры белән “Тамчы”  вокал - хореография ансамбле чакырылган иде.

Нәтиҗәләр: "ТАМЧЫ" вокал-хореографик ансамбле - ГРАН-ПРИ! (Харрасова Л. А. Свищева Л. А.)

Харрасова Лилия Альберт кызы (вокал - соло) - 1 дәрәҗә Лауреат (концертмейстер Харрасов М .Р.).

Укучыларыбызны һәм аларның укытучыларын конкурс елының уңышлы тәмамлануы белән котлыйбыз!