ЯҢАЛЫКЛАР

17 августта Миңгәр авылында Саба район китапханәсе Казан халык һөнәрләре техникумы вәкилләре алдында күргәзмәдә катнаштылар.

16  нчы августта Казан шәһәренең "Б.Рәмиев исемендәге IT паркның " бинасында "Мәгариф теориясендә һәм практикасында культурологик алымны гамәлгә ашыру" күргәзмәсе оештырылды.

          10 август көнне Саба район китапханәсенең уку залында хезмәт ветераны, "Өлкәннәр" клубының актив әгъзасы Сабитов  Фаметдин Сабит улының 85 яшьлек юбилеена багышланган "Мәхәббәтле гомер" дип исемләнгән портрет-кичә үткәрелде. 

Саба урман хуҗалыгы тарихы музее хезмәткәрләре балалар өчен Лесхоз бистәсенең истәлекле урыннарына экскурсия оештырдылар. Чараның башлангыч ноктасы билгесез солдат һәйкәле булды, музей хезмәткәрләре Бөек Ватан сугышында катнашып, яу кырында ятып калган каһарманнар турында сөйләделәр. Аннары Миңнеханов Нургали Миңнеханович бюсты янына бардылар, аның күпьеллык һәм зур уңышларга ирешкән хезмәтен искә алдылар. Соңгы тукталыш композитор Фасил Әхмәтовка багышланган мемориаль такта янында булды. Күренекле композиторның тормыш юлы һәм иҗаты белән якыннанрак таныштылар.

Ел саен 9 август - Бөтендөнья китап сөючеләр көне билгеләп үтелә.

Туган як ул- безнең туган, үскән һәм гомер иткән җиребез. Иң җылы хатирәләр, күңелле тарихлар, шатлыклы вакыйгалар туган авыл белән бәйләнгән. Сатыш авылы мәдрәсә музее хезмәткәрләре балалар өчен “Туган ягым буйлап сәяхәт” дип исемләнгән экскурсия  оештырдылар. Экскурсия  "туган җир" төшенчәсе турында сөйләшүдән башланды һәм күңелле уеннар белән дәвам итте. Балалар сәяхәттән күп көч һәм энергия туплап кайттылар.  

3 август көнне Район китапханәсенең уку залында “Өлкәннәр” клубының чираттагы утырышы узды. Очрашуга​ Явлаштау авылында гомер итүче “Татарстанның атказанган терлекчесе” Ринат Шамилов килде. 

2023 елның 28 июлендә Саба сәнгать мәктәбенең баян сыйныфының укучылары өчен "Ямьле Саба" яр буенда  «Татарстан мәдәнияте, татар халкының гореф-гадәтләре" исемле бәйрәм чарасы "Сабантуй" узды.

Челтер-челтер аккан чишмәләр кемнәрне генә сокландырмый да, кемнәрне генә сихерләми икән. Һәр чишмәнең үз тарихы, үз моңы, үз юлы бар. Бер ишесе шаулап ага, тавышы еракларга ишетелә. Икенчеләренең челтерәве яннарына килгәч ишетелә. Өченчеләре җир куеннынан ургылып чыга да, яшел үзәннәргә җәелә. Чишмәләр - пакълек, чисталык, сафлык билгесе дә. Балаларның игътибарын, Байлар Сабасында урнашкан чишмәләр тарихы  белән җәлеп итү максатыннан, район туган якны өйрәнү музее хезмәткәре экскурсия оештырды. Экскурсия барышында  балалар белән чишмәләр янында, чишмәләргә һәм кечкенә елгаларга сакчыл мөнәсәбәт, аларны саклауның мөһимлеге турында әңгәмә үткәрелде. “Ямьле Саба” яр буенда урнашкан чишмәләрнең тарихын тыңладылар, чишмәдән су эчтеләр, кызыксындырган сорауларны бирделәр. Шулай ук әлеге чара вакытында балалар төрле милли уеннарда да актив катнаштылар.

Бүген Саба туган якны өйрәнү музеенда "Туган якны өйрәнүчеләр" клубының чираттагы утырышы оештырылды. Чарага шулай ук "Сатыш - гасырлар аша 2" китабы авторы Гайнетдинова Рузилә дә чакырылган иде. Очрашуда Саба районы биләмәсенә кергән авыллар исемнәренең килеп чыгышы турында тарихи чыганакларны кулланып фикер алышу булды. Шулай ук халык санын алу буенча ревизия документларына таянып авылларның якынча барлыкка килү вакытлары турында да сөйләшенде. Һәр катнашучы актив булды, үз фикерен аңлатты, теге яки бу китаптан алынган мәгълүмат, фактлар ярдәмендә дәлилли алды. Исемнәр арасында иң зур кызыксыну уятканы Саба  сүзенең килеп чыгышы булды. Шуның өчен дә, без һәрберебез туып үскән җир белән өзлексез бәйләнгән. Һәм кайда гына булсак та, туган үскән җиребезне күңелебездән чыгарырга хакыбыз юк...