ЯҢАЛЫКЛАР

   Кече Шыңар мәдәният йорты каршындагы «Нур» халык театр коллективы көзге каникул көннәрендә Саба районының төрле авылларында  балаларга Д.Зыятованың «Ахмак куян» әкиятенә нигезләнеп куелган спектаклен күрсәтте.

   Театр могҗизалар эшли: күңелне күтәрә, тәрбияли, яхшыны яманнан аерырга өйрәтә. Әкиятнең сюжеты гади: мактанчык куян төлкене алдап чокырга төртмәкче була, ләкин чак  кына төлке тәпиенә эләкми кала. Бу бәладән куянны керпе дусты коткара.

   Әкият декорацияләре, матур күңелле музыка,  кызыклы  сюжет балаларны әсир итте.

Олы Шыңар авыл җирлеге территориясендә иске йортларны сүтү дәвам итә. Чулпыч авылында шундый чара оештырылган иде. Бу иске корылмалардан котылырга гына түгел, җирле халыкка уңайлы яшәү өчен шартлар тудырырга да мөмкинлек бирә.

Олы Шыңар авылында  яшәүче Гайфуллина Минсырур Низами кызына 2025нче елның 25нче октябрендә 95 яшь тулды. Саба муниципаль районы башлыгы Р.Н.Миңнеханов исеменнән котлау һәм истәлекле бүләкләрне Саба муниципаль районындагы халыкны социаль яклау бүлеге башлыгы Гайнетдинова Лилия Нургаян кызы тапшырды. Котлауларга шулай ук Олы Шыңар авыл җирлеге башлыгы А.Г. Гарипов,  Олы Шыңар урта мәктәбе директоры Мөбәрәков Р.Г. та  кушылды.

   Минсырур    Низами кызы  Сабай авылында    дөньяга килә. Әнисе Таһирә, әтисе Низаметдин, 4 бертуганы: апасы, 2 энесе була.

   1937 елның сентябрь аенда Сабай башлангыч мәктәбенә беренче сыйныфка укырга керә,  4 класс белем ала.

   Мәктәпне тәмамлагач колхозда төрле эшләрдә катнашып йөри.

   1954 елның декабрь аенда Олы Шыңар авылы егете Гарифулла абый белән гаилә корып яши башлыйлар. Килен булып килгәч башта колхозда төрле эшләрдә йөри , аннан соң Олы Шыңар авыл  авыл мәктәбендә башта җыештыручы, аннан пешекче булып эшли. Пешекче булып 22 елга якын хезмәт куя .

   Гарифулла абый белән 61 ел бергә яшиләр, ул 2015 елда вафат була. 3 кыз, 1 малай үстерәләр:кызлары Гөлфлүр, Фаягөл, Галия, уллары Дамир , 7 онык, 11 оныкчык лары бар. Бүгенге көндә Олы  Шыңар авылында балаларының тәрбиясендә яши, күршеләре белән бер-берсенә ярдәм итешеп торалар.

Иске йортларны, сарайларны сүтү -авыл җирлекләре өчен актуаль мәсьәлә. Оет авылында күптән түгел генә кулланылыштан чыккан иске йорт сүтелде.

Районның «Авыл яши» проекты кысаларында 17 октябрь көнне Кече Шыңар мәдәният йортында авыл китапханәсе белән берлектә «Игенче һөнәре» дигән тематик кичә үткәрелде. Чарага авыл хуҗалыгы җитештерү тармагында эшләүче кунаклар чакырылган иде. Алар балаларга үз эшләрендәге үзенчәлекләр, игенчелекнең авыр, ләкин мактаулы һәм бик хөрмәтле һөнәр булуы турында сөйләделәр. Икмәк үстерү өчен җирне бөтен йөрәгең белән яратырга һәм аңа ихлас күңелдән үз җылыңның бер өлешен бүләк итәргә кирәк. Моннан тыш, катлаулы техникадан камил файдалана белергә, чәчү процессының нечкәлекләрен белергә, басуларны ашламалар белән тукландырырга, урып-җыю эшләрен дә белергә, шулай ук ремонт эшләрен дә белергә кирәк, чөнки машиналар иң уңайсыз вакытта сафтан чыгарга мөмкин, ә механикны көтәргә вакыт юк. «Икмәк-күмәч эшләнмәләре»тематик күргәзмәсе тәкъдим ителде. Икмәк турындагы мәкальләр һәм әйтемнәр искә төшерделәр.  Балалар икмәк үстерү - мактаулы хезмәт, әмма ул остадан тулысынча фидакарьлек, җыелганлык, сабырлык  таләп итә дигән нәтиҗәгә килделәр.

Олы Шыңар авыл җирлегендә әйләнә-тирә мөхитне төзекләндерү буенча максатчан эш алып барыла. Шул максат белән өрәңге агачларын кисү оештырылды. Чаралар гражданнарга яшәү уңайлылыгын арттыруга һәм уңайлы табигать мөхитен саклауга юнәлдерелгән.

5 октябрь көнне Кече Шыңар мәдәният йортында Бөек Җиңүнең 80 еллыгына багышланган "Җиңү килде безнең урамга" исемле концерт булды. Концертны "Югары Утар психик тайпылышлары булган гражданнар өчен балалар интернат йорты"дәүләт казна учреждениясе хезмәткәрләре оештырды. Чара җылы, дустанә атмосферада узды. Программага сугыш еллары җырларын башкару, бию номерлары һәм тематик инсценировкалар кертелгән иде.

Олы Шыңар урта мәктәбендә Укытучылар көне һәм Өлкәннәр көне уңаеннан бәйрәм концерты үткәрелде. Балалар кызыклы чыгышлар әзерләделәр: күңелгә үтеп керерлек шигырьләр, матур бию номерлары һәм күңелгә ятышлы музыкаль композицияләр яңгырады. Укучылар укытучыларга сабырлыклары, кайгыртучанлыклары һәм аларның белем алуына керткән өлешләре өчен ихлас рәхмәтләрен белдерделәр.

Олы Шыңар авыл җирлегенең Оет авылында юл эшләре башланды. Эшне «Рамазан»ҖЧҖ башкара. Җирле халык уңай үзгәрешләргә һәм транспорт инфраструктурасының яхшыруына өметләнә.

   Барлык өлкәннәр дә туганнары белән янәшә яшәми. Кайберләре картлар йортларында яши. Бүген Олы Шыңар авыл җирлеге башлыгы  өлкәннәр интернат-йортында яшәүче авылдашларыбызны бәйрәм белән  котлады.

   Без картлар йортларында яшәүче авылдашларыбызны чын күңелдән бәйрәм белән котлыйбыз. Сезгә ныклы сәламәтлек, күңел күтәренкелеге, тыныч тормыш телибез.